MULLER
Martes 18 de abril do 2006
O Centro de Información á Muller de Carballo organiza un novo curso de Risoterapia, a celebrar no Pazo da Cultura desde o 27 de abril até o 15 de xuño. Os interesados en participar do mesmo deben facer a inscripción antes do 27 de abril, ben no propio Centro de Información á Muller ou ben nos Servizos Sociais do Concello de Carballo. O curso impartirase tódolos xoves de 20,00 horas a 21,30 horas. A Risoterapia é unha porta para lograr a relaxación, abrir a capacidade de sentir e crear utilizando a risa como camiño. Utilízanse técnicas que axudan a liberar tensións para chegar á risa, como a expresión corporal, o xogo, a danza, masaxes ou exercicios de respiración.
MEDIO AMBIENTE
Martes 18 de abril do 2006
Esta semana comezarán os traballos de contenerización soterrada na rúa Coruña de Carballo. As obras contan cun orzamento de 55.720 euros e prolongaranse por espazo de dous meses. A previsión de remate das labouras está prevista para o vindeiro mes de xuño, e levaranse a cabo no principio da rúa, á altura do Padroado Deportivo Municipal. A iniciativa, cofinanciada con fondos europeos de cohesión, permitirá facilitar aos veciños a recollida selectiva e posterior reciclaxe dos residuos sólidos.
TELEFONÍA
Luns 17 de abril do 2006
O Concello de Carballo cambiará a súa centralita de teléfonos por unha nova que permitirá implantar novos servizos de comunicacións, tanto para uso interno como para servizo dos cidadáns. O cambio terá lugar este martes, 18 de abril, ás 16,00 horas. Entre outros servizos, implantaranse buzóns de voz para comunicar deficiencias en servizos, accesos directos telefónicos a certos servizos como padrón, contratación, facturas e pagos, servizos de información sobre eventos institucionais, culturais e outros.
CARBALLO LIMPO
Luns 17 de abril do 2006
A concellaría de Medio Ambiente ven de convocar aos representantes de talleres do textil da localidade a unha xuntanza para explicar o modelo de xestión dos residuos propios do sector. A reunión terá lugar o martes, 18 de abril, ás 19,00 horas na Sala de Xuntas do Concello de Carballo.
XUNTA DE GOBERNO LOCAL
Luns 17 de abril do 2006
A Xunta de Goberno Local ven de aprobar, na súa última sesión, a solicitude á Consellaría de Traballo dunha subvención para a financiación en Carballo de Obradoiro de Emprego, logo de aprobar na mesma sesión a memoria do proxecto para obradoiros de emprego, elaborado polo Centro Municipal de Formación, nas especialidades formativas de enconfrador, fontaneiro, pintor e xardineiro. A subvención sería de 276.480 euros para financiar gastos de formación e funcionamento e de 473.212 euros para financiar custos salariais de alumnos-traballadores.
LITORAL
Mércores 12 de abril do 2006
O Concello de Carballo ven de deseñar un dispositivo especial de limpeza e recollida de lixo no litoral, para que tódolos veciños e visitantes do municipio conten cun bo servizo durante a Semana Santa. A actuación contempla tamén a dotación de papeleiras nas praias, co ánimo de poder disfrutar dos areais en perfecto estado durante estas datas.
OBRAS
Mércores 12 de abril do 2006
A empresa Indeza segue a traballar sobre o terreo onde se levanta a Casa dos Oficios, no barrio da Milagrosa. Logo de realizar, nun primeiro momento, os traballos de excavación, drenaxe, cubrición e encofrado das zapatas, xa se pode ver a estructura metálica das dúas primeiras naves do proxecto.
SEGURIDADE
Mércores 12 de abril do 2006
O Concello de Carballo formalizará a súa adhesión, a través da Xunta de Goberno Local, ao protocolo de colaboración e coordinación entre as Forzas e Corpos de Seguridade do Estado e os Corpos da Policía Local para a protección das víctimas da violencia doméstica e de xénero. A Xunta Local de Seguridade acordou crear unha mesa representada pola Policía Local, Garda Civil e Centro de Información á Muller para facer un seguimento do asunto.
TURISMO
Martes 11 de abril do 2006
O Concello de Carballo ven de remitir á Consellaría de Innovación e Industria, a través da Dirección Xeral de Turismo e ao abeiro das subvencións a concellos do litoral para o acondicionamento e mellora das zonas de costa onde se practique asiduamente o baño para o ano 2006, unha solicitude de subvención de 59.587,04 euros para facer diferentes melloras nas zonas costeiras de Razo e Baldaio. As obras para as que o Concello demanda a subvención son a dotación de pasarela de madeira en zona verde, a ampliación de depósito de auga en Arnados, a formación de escaleira e pasarela en baixada a praia de Razo pola Cabreira, drenaxe de pluviais en zona verde xunto á Pista Polideportiva, a instalación de grupo de bombeo de fecais en caseta de socorristas en Pedra do Sal e dotación de mobiliario urbano. Prevese unha duración de dous meses para a execución da obra completa.
LECER
Luns 10 de abril do 2006
A Vicepresidencia da Igualdade e do Benestar, a través da Dirección Xeral de Xuventude e Solidariedade, leva a cabo a promoción e organización de actividades de animación sociocultural destinadas á mocidade no ámbito do ocio e o tempo libre. A oferta da Campaña Verán-2006 comprende, ademais daquelas que se desenvolven na comunidade autónoma galega, actividades de ámbito nacional, que teñen lugar noutras comunidades autónomas de España. A Xunta pretende, desta forma, atender a demanda individual, cada día máis crecente, de mozos e mozas no eido do ocio e o tempo libre.
VIVIR O MUNDO
Luns 10 de abril do 2006
A Casa do Concello acolleu a celebración do sorteo público para determinar que rapaces participan do programa organizado pola Deputación da Coruña Vivir o Mundo, que pretende achegar aos rapaces e rapazas da provincia a Roma, cidade de gran interese monumental e cultural. O ente provincial concedeu 12 prazas a Carballo, que foron sorteadas entre case un centear de solicitudes presentadas no Concello.
LINGUA
Luns 10 de abril do 2006
O Concello de Carballo vén de presentar, a través do Servizo de Normalización Lingüística, un obradoiro de integración lingüística e cultural para inmigrantes e emigrantes retornados/as. Trátase dunha actividade encamiñada a fomentar o uso de galego e que se desenvolverá do 2 ao 31 de maio. O Concello agarda repetir a exitosa experiencia do ano pasado e seguir no camiño para que a lingua non sexa un impedimento para integrarse, como manifestou a concelleira de Cultura, Belén Lendoiro, na presentación da actividade.
.jpg)