.jpg)
O Campionato de España volve a traer o autocross ao Circuíto Municipal de Carballo cunha participación récord
Mércores 6 de xullo do 2022
.jpg "Marcos Trigo, Ernesto Rumbo, Evencio Ferrero, Juan Fernández e Maikel Vilariño")
Marcos Trigo, Ernesto Rumbo, Evencio Ferrero, Juan Fernández e Maikel Vilariño
O Circuíto Municipal de Carballo acolle esta fin de semana a cuarta proba do Campionato de España de Autocross (e a número 14 do calendario local), que pecha a primeira parte da tempada cun récord de participación difícil de igualar. Por segunda vez na historia da competición, en todas as probas superouse a barreira dos cen participantes, e na de Carballo acádase a cifra máis alta con 115.
Ernesto Rumbo, presidente do comité organizador; Juan Fernández, do Club Rally Coruña; o concelleiro de Deporte, Marcos Trigo, e o alcalde, Evencio Ferrero, participaron hoxe na Praza do Concello na presentación do 14º Autocross Carballo, á que tamén se sumou o piloto local Maikel Vilariño cun flamante vehículo de carcross, categoría raíña da competición. De feito, en Carballo triplícase o número de monoplazas das carreiras anteriores. O espectáculo está asegurado.
.jpg "Maikel Vilariño, que competirá en car cross, será un dos representantes locais")
Maikel Vilariño, que competirá en car cross, será un dos representantes locais
Despois das tres carreiras celebradas nos circuítos de Alcañiz, Esplús e Cerro Negro, os líderes provisionais son Víctor Álvarez (división 1), Cristian Escribano (división 2), Carlos Hernando (división 3), Joan Salichs Roura (car cross), Pol Durán (car cross júnior) e Gabriel Durán (car cross promoción). Carballo estará representado no noso Circuíto Municipal por Dani Castro, Alberto Varela, Alberto Lorenzo, Javier Ramilo e Maikel Vilariño. E tamén estará representada a escudería local Máis Motor. A participación bergantiñá eleva a representación local, e destaca a presenza da pontecesá Sandra García na divión 1, xa que é a única muller entre os 115 pilotos.
O 14º Autocross Carballo comezará o venres pola tarde con adestramentos libres e verificacións, que continuarán o sábado 9 pola mañá no propio circuíto. O sábado disputaranse as primeiras mangas clasificatorias, e o domingo serán as terceiras e as finais, que poderán verse en directo a través da canle de YouTube da Federación Española de Automobilismo (atoparedes a ligazón máis abaixo).