FORMACIÓN
Martes 23 de decembro do 2008
A Escola Obradoiro que se está desenvolvendo en Carballo nestes momentos entra a partir de agora nunha nova etapa. Así, os 40 alumnos e alumnas desta actividade veñen de asinar os contratos cos que xa poderán dar os seus primeiros pasos no mundo laboral a través das prácticas. Nun acto que contou coa presenza do Alcalde de Carballo, Evencio Ferrero, e do Tenente de Alcalde, José Antonio Viña, os rapaces e rapazas rubricaron o comezo da súa nova actividade, que principia o 27 de decembro.
O PROXECTO ACADA UN ORZAMENTO DE 250 MILLÓNS
Luns 22 de decembro do 2008
Xa están iniciadas as obras de construción da autovía Carballo-Berdoias, o principal eixo da vía de alta capacidade da Costa da Morte. O presidente da Xunta, Emilio Pérez Touriño, colocou hoxe en Carballo a primeira pedra desta nova infraestrutura, acompañado da Conselleira de Política Territorial, María José Caride, do Alcalde de Carballo, Evencio Ferrero, e do Tenente de Alcalde, José Antonio Viña. O orzamento previsto para a actuación acada os 250 millóns de euros do total de 350 millóns que a Xunta está a investir no eixo de altas prestacións da Costa da Morte que enlazará Carballo con Brens (Cee) e Sardiñeiro (Fisterra).
FORMACIÓN E EMPREGO
Luns 22 de decembro do 2008
O Concello de Carballo e a Deputación da Coruña formalizaron o luns 22 de decembro un convenio de colaboración que permitirá financiar o proxecto da Casa dos Oficios cun importe total de 700.000 euros, dos que o organismo provincial achega 500.000 -arredor do 70 por cento do total. Este acordo, asinado polo Alcalde carballés, Evencio Ferrero, e o Presidente da Deputación, Salvador Fernández Moreda, servirá para axudar co financiamento da construción das naves do recinto que aínda están sen finalizar. Está previsto que os traballos recollidos neste convenio estean rematados no verán de 2009.
CULTURA
Luns 22 de decembro do 2008
O Concello de Carballo pon en marcha ao longo do ano 2009 unha Aula Municipal de Teatro afeccionado para "estimular a creación artística" e propoñer unha actividade "formativa e de lecer" para adultos, en verbas da Concelleira de Cultura, Belén Lendoiro. O obxectivo desta iniciativa é ampliar o coñecemento do teatro que xa hai na vila e enfocalo dende outra perspectiva, ampliando a oferta xa existente a través de citas de renome como o Outono de Teatro (FIOT) ou da programación estable que hai ao longo de todo o ano. O actor, autor e director teatral Artur Trillo, ben coñecido na vila polas súas intervencións no FIOT e por desenvolver boa parte da súa actividade en Cee, será o encargado de dirixir a escola.
FORMACIÓN
Venres 19 de decembro do 2008
A Escola Obradoiro que se está desenvolvendo en Carballo nestes momentos entra a partir de agora nunha nota etapa. Así, María Manso Cid, Concelleira de Formación, Emprego e Participación Veciñal informa de que o vindeiro martes 23 de decembro ten lugar no Centro Municipal de Formación a firma dos contratos dos 40 alumnos e alumnas desta actividade, que xa poderán dar os seus primeiros pasos no mundo laboral.
OBRAS
Venres 19 de decembro do 2008
O Consello da Xunta vén de autorizar un convenio de colaboración entre a Consellería de Política Territorial e o Concello de Carballo para acometer a mellora da travesía de Malpica da capital municipal. Segundo o acordo que se asinará proximamente, a Consellería financiará cun total de 907.000 euros as obras de acondicionamento e mellora da seguridade viaria do treito da estrada autonómica AC-416 (entre os puntos quilométricos 0 e 1,360) ao seu paso polo núcleo urbano de Carballo, mentres que o Concello aporta 240.000 euros, chegando o importe total da actuación a 1.150.000 euros.
CARBALLO SAUDABLE
Venres 19 de decembro do 2008
O proxecto carballés de Concellos Saudables atópase entre as oito mellores propostas de toda Galicia. Así quedou posto de manifesto o venres 19 de decembro na celebración da segunda Xornada sobre Cidades e Concellos Saudables, celebrada no Pazo de Exposicións e Congresos de Santiago de Compostela, na que a proposta carballesa foi seleccionada para abrir a rolda de intervencións -da man do coordinador da actividade, Manuel Varela Bardanca- na que se expuxeron as metodoloxías e os resultados dos oito mellores proxectos de Galicia.
NADAL CULTURAL
Xoves 18 de decembro do 2008
O xoves 18 de decembro chega un dos pratos fortes do Nadal Cultural de Carballo cun concerto da Orquestra da Escola de Altos Estudos Musicais de Santiago de Compostela. Baixo a batuta do prestixioso director Jordi Mora, o público asistente poderá desfrutar de obras como a Obertura da Frauta Máxica de Mozart, a Pettit Suite de Debussy e a segunda parte da sinfonía número 2 de Beethoven. O concerto principia ás 20.30 horas no Pazo da Cultura e a entrada é de balde.
MEDIO AMBIENTE
Martes 16 de decembro do 2008
O Concello de Carballo vén de colocar un total de quince novos colectores de recollida selectiva de envases lixeiros en diferentes edificios públicos da capital municipal co obxecto de promover a reciclaxe entre os veciños e veciñas, pero tamén entre os máis cativos e cativas. Trátase de contedores amarelos, cunha capacidade de 120 litros, que están situados nos dous pavillóns polideportivos e en tres dos centros escolares do casco urbano.
PATRIMONIO
Luns 15 de decembro do 2008
Aos veciños e veciñas interesados en comprobar o novo valor catastral das súas propiedades e vivendas tan só lles resta unha semana para acudir ao Pazo da Cultura de Carballo e analizar cos técnicos os datos resultantes da revisión realizada polo Ministerio de Hacienda. Así, despois de case un mes dende a posta en marcha do servizo de atención ao público habilitado polo Concello, o próximo luns 22 de novembro remata o prazo para consultar e revisar os datos. Os carballeses e carballesas que queiran facelo aínda poden acudir en horario de 9.00 a 14.00 horas, e de 16.00 a 18.00 horas, de luns a venres.
BENESTAR
Venres 12 de decembro do 2008
O Concello de Carballo e a asemblea local da Cruz Vermella queren animar aos carballeses e carballesas a que participen no programa de acollemento familiar de menores, unha iniciativa na que familias voluntarias acollen temporalmente no seu fogar a nenos, nenas e adolescentes daquelas outras familias que están a pasar por unha situación de crise temporal que lles impide atender axeitadamente aos seus fillos e fillas. Nestes momentos, cinco unidades familiares do entorno de Carballo e da Costa da Morte están tomando parte neste programa que representa "o labor solidario na súa máxima expresión", en verbas de Marta Pintos, unha das responsables da iniciativa na provincia coruñesa.
CULTURA
Venres 12 de decembro do 2008
Coa chegada do inverno e do frío tamén volve a Carballo o Nadal Cultural, un programa de actividades especialmente dirixido aos máis cativos e cativas que este ano recupera o xa habitual Nadal Pequespectacular e que inclúe contacontos, música, cine, exposicións, obradoiros ou festivais, ademais das visitas de Papá Noel e os Reis Magos. Dende o 12 de decembro e ata o 6 de xaneiro as propostas enchen cada día do Nadal en moitos dos puntos do Concello e coa colaboración de moitas das asociacións do municipio. O programa recolle ademais, as imaxes gañadoras do Concurso de Cartel e Postal de Nadal, que este ano tivo o primeiro premio en Lucía Mahía, de 3 anos de idade e alumna do CEIP Fogar; e o segundo en Marta Villar Cerqueiro, de 7 anos e alumna do CRA Ponte da Pedra.
.jpg)
