PROGRAMACIÓN ENTRE XANEIRO E ABRIL
Xoves 15 de xaneiro do 2009
A estabilidade, a diversidade de estilos e a elevada calidade das actuacións son as principais características do programa dos Venres Culturais de Carballo que artellará boa parte da oferta lúdica e de ocio no municipio durante as próximas semanas e ata o mes de abril. Así o manifesta a Concelleira de Cultura, Belén Lendoiro, que expón unha proposta na que a maxia -coa novidade de actuacións para adultos-, a música - clásica, pop ou de autor-, o teatro -con monicreques e obras de sala- e as exposicións -de escultura, pintura ou fotografía- conforman o groso do programa, sen esquecer o xa habitual apartado 'En familia'.
EDUCACIÓN
Xoves 15 de xaneiro do 2009
O Concello de Carballo retoma este venres 16 de xaneiro o programa de charlas incluídas no programa 'Aprender para educar'. Neste caso, os interesados e interesadas poderán escoitar as claves dos 'Dereitos e deberes dos adolescentes' cunha charla a cargo de Carme Loureiro López, do CSM Fingoi. 'Aprender para educar' é unha iniciativa organizada polo Concello de Carballo xunto coa Asociación Socio-Pedagóxica Galega (ASPG) e está dirixida a nais e pais que queiran formarse para aprender, reflexionar e adquirir seguridade diante da tarefa de educar. Neste caso, a cita é no Pazo da Cultura a partir das 20.00 horas.
OS INVESTIMENTOS REAIS PARA 2009 CHEGAN AOS 15 MILLÓNS DE EUROS
Sábado 10 de xaneiro do 2009
O goberno carballés investirá os 5.325.352 euros do Fondo Estatal de Investimento Local en trece proxectos que servirán para crear un total de 122 postos de traballo directos no municipio. O obxectivo destas actuacións é incrementar "a calidade dos servizos dos cidadáns e contribuír á transformación do conxunto urbano e rural de Carballo", en verbas do Alcalde, Evencio Ferrero. Os proxectos abordan melloras nas instalacións municipais, a creación de centros sociais, melloras de cara á humanización do centro da capital municipal, a creación de saneamentos e a mellora da seguridade viaria. Así mesmo, o Concello carballés contará no exercicio de 2009 coa dispoñibilidade de 15 millóns de euros para destinar a investimentos reais, sumando o capítulo 6 dos orzamentos -duns 10 millóns de euros- e a cantidade do Fondo Estatal.
CABALGATA ENTRE AS 17.00 E AS 20.00 HORAS
Luns 5 de xaneiro do 2009
Os cativos e cativas de Carballo poden transmitirlle hoxe aos Reis Magos de Oriente todos os seus desexos porque as súas Maxestades percorren as principais rúas da vila para anunciar a chegada dos agasallos que entrarán pola noite en tódalas casas carballesas. O Concello de Carballo e a Asociación Fogar da Xuventude organizan esta cita -patrocinada polo Haley e Gonzacar- que comeza ás 17.00 horas no Centro Comercial Bergantiños e que remata na carpa da Praza do Concello ás 20.00 horas, e na que Melchor, Gaspar e Baltasar saudarán aos nenos e nenas en cadansúa carroza repartindo caramelos e agasallos.
XUNTA DE GOBERNO LOCAL
Domingo 4 de xaneiro do 2009
A Xunta de Goberno Local, celebrada o luns 4 de xaneiro, vén de aprobar a adxudicación definitiva da obra de 'Instalación de enerxía solar térmica e reforma da produción de ACS na piscina municipal de Carballo', que suporá a instalación de paneis solares na piscina Vila de Noia da capital municipal. A empresa responsable dos traballos é Ifecgas Pereira SL e o prezo de adxudicación de 182.476,10 euros. O prazo de execución é o ofertado polo licitador de 57 días dende a firma da acta de replantexamento. Esta actuación virá a completar os traballos de reforma integral que nestes momentos están a piques de rematar nesta piscina, que se realizan con cargo a FEIL (Fondo Estatal de Investimento Local) e que contan cun orzamento de 892.182,16 euros.
PROMOCIÓN ECONÓMICA
Venres 2 de xaneiro do 2009
Durante dous días a Praza do Concello e o centro carballés contarán con obradoiros, unha biblioteca infantil, inchables xigantes, teatro de monicreques, paiasos e malabares ou incluso cunha aula tecnolóxica con ordenadores. Trátase da campaña 'Comercio Galego Vivo', organizada pola Dirección Xeral de Comercio e o Concello que o venres 2 e o sábado 3 de xaneiro, espera animar "a tódolos consumidores a que merquen no comercio local", en verbas da propia Directora Xeral de Comercio, Ana Rúa, que inaugurou as actividades acompañada polo Alcalde, Evencio Ferrero.
DEPORTE
Martes 30 de decembro do 2008
O Pavillón da Zona Escolar (Vila de Noia) de Carballo acolle o domingo 4 de xaneiro un partido amigable entre as seleccións absolutas masculinas de balonmán de Galiza e Arxentina. Unha cita gratuíta que se enmarca dentro dos actos do 25 aniversario da Federación Galega de Balonmán e da Asociación Deportiva Xiria de Carballo, organizadoras da cita xunto co Concello e a Consellería de Cultura e Deporte. Precisamente o presidente da Federación Galega, Xosé Luís Pérez Ouro, subliña que "o balonmán débelle moito a este Concello e a esta comarca", de aí a elección de Carballo para a celebración do encontro.
CARBALLO MOVIDA SEGURA
Martes 30 de decembro do 2008
O Concello de Carballo pon en marcha dúas liñas de Noitebús para empregar na noite de Fin de ano entre as 1.00 e as 8.00 horas para poder acudir a Malpica, Ponteceso e A Coruña. No caso de Malpica e Ponteceso, trátase dunha liña circular que pasa por Coristanco, Agualada, Cereo, Xornes, Ponteceso e Malpica. No segundo, o servizo transcorre pola estrada comarcal AC-552 pasando por núcleos como Arteixo, Lañas, Paiosaco, A Laracha ou Proame. O prezo dos billetes é de 2 euros para unha viaxe de ida e volta e a compañía de autobús encargada do servizo neste caso é a Compañía Metropolitana de Transportes da Coruña.
PROMOCIÓN ECONÓMICA
Martes 30 de decembro do 2008
A campaña 'Comercio Galego Vivo', posta en marcha pola Dirección Xeral de Comercio, chega a Carballo coa colaboración do Concello para encher de animación e actividades para os máis cativos e cativas a Praza do Concello. O venres 2 e o sábado 3 de xaneiro a vila contará con obradoiros, unha biblioteca infantil, inchables xigantes, teatro de monicreques, paiasos e malabares ou incluso cunha aula tecnolóxica con ordenadores. A campaña complétase cun festival infantil organizado polo Concello e o Centro Comercial Aberto (CCA) o domingo 4 pola tarde. O obxectivo destas iniciativas é incentivar a demanda do pequeno comercio local -especialmente nas datas de Reis- tendo en conta a actual conxuntura económica.
DEPORTE
Venres 26 de decembro do 2008
O piloto de motos carballés Fran Gómez Pallas xa o ten todo listo para afrontar por sexta vez a aventura do rally Dakar, que este ano ten lugar entre o 3 e o 18 de xaneiro e transcorre por América do Sur durante máis de 1.350 quilómetros con saída e chegada en Bos Aires. O Alcalde de Carballo, Evencio Ferrero, recibiu a este deportista no Concello para desexarlle sorte e apoialo nesta nova andaina na que conta co patrocinio institucional do Concello de Carballo, da Deputación da Coruña e da Fundación do Deporte Galego.
XUNTA DE GOBERNO LOCAL
Martes 23 de decembro do 2008
A Xunta de Goberno Local de Carballo celebrada o luns 22 de decembro deu luz verde ao expediente de contratación para a edificación da cuarta fase da Casa dos Oficios de Carballo por un orzamento de contrata de 3.299.008 euros -cun horizonte de financiamento que chega ata o ano 2010- e cun prazo total de execución de 18 meses, segundo consta no proxecto de obra realizado polo arquitecto Manuel Carbajo. O procedemento elixido para a adxudicación dos traballos é aberto. Avanzan así os trámites para a execución do proxecto da Casa dos Oficios que suporá a creación dun gran centro de formación no barrio da Milagrosa.
PRESENTACIÓN DO CALENDARIO DE 2009
Martes 23 de decembro do 2008
O Concello principia unha campaña de promoción turística denominada 'Vive Carballo' destinada a difundir o patrimonio, os espazos de interese da vila e os seus recursos. A través dunha páxina web e tamén mediante produtos como camisetas, pegatinas ou mesmo o calendario de 2009, o obxectivo é a posta en valor da oferta turística do municipio. A iniciativa tamén está dirixida aos propios carballeses e carballesas, para que eles mesmos poidan redescubrir os recursos do Concello, e ademais "cada un dos veciños e veciñas poderán ser guías turísticos e promotores dos nosos recursos", segundo subliña o Concelleiro de Promoción Económica, Xosé Manuel García Guillín.
.jpg)
