DEPORTE
Venres 6 de febreiro do 2009
O piloto de motos carballés, Fran Gómez Pallas, vén de rematar a súa aventura no Rally Dakar, ao que acudiu por sexta vez e no que conseguiu cruzar a liña de meta. O Concello de Carballo rendeulle onte unha homenaxe pola súa andaina, na que representou á vila por terras arxentinas e chilenas, onde transcorreron as etapas dun rally con saída e chegada en Bos Aires. O Alcalde, Evencio Ferrero, manifestou que "a calquera carballés lle ten que encher de orgullo que un de nós nos estea representando nunha das probas de maior seguimento a nivel mundial", e quixo felicitar a Fran Gómez polo seu rally, ao que acudiu co patrocinio institucional do Concello de Carballo, da Deputación da Coruña e da Fundación do Deporte Galego.
OBRAS
Xoves 5 de febreiro do 2009
Veñen de comezar a principios desta semana os traballos para a creación de beirarrúas en Vivente, na parroquia de Ardaña. As obras desenvólvense no tramo que vai dende a capela de Vivente ata Santa María, co obxectivo de conectar as novas beirarrúas coas xa existentes no mesmo ámbito. O proxecto está incluído no Plan de Obras e Servizos (POS) da Deputación provincial para 2008 e foi adxudicado á empresa Alejandro Martínez e Hijos por un importe de 147.668 euros. O prazo de execución previsto é de seis meses.
A NOVA INFRAESTRUTURA DARÁ SERVIZO A 2.000 HABITANTES
Xoves 5 de febreiro do 2009
O Consello da Xunta acaba de darlle luz verde -a proposta da Consellería de Medio Ambiente e Desenvolvemento Sostible- ao proxecto para a construción da rede de colectores xerais e depuradora de Ardaña, que prestará servizo aos municipios de Carballo e Coristanco. Trátase dunha planta de tratamento de augas residuais que dará servizo ás parroquias de Rus, Ardaña, Entrecruces -en Carballo- e Erbecedo -en Coristanco- e supón un investimento de 2.774.179 euros, que serán financiados na súa totalidade pola Empresa Pública de Obras e Servizos Hidráulicos (Eposh).
SEGUNDO ANDAR DA CASA CONSISTORIAL DE 9.00 A 14.00 HORAS
Mércores 4 de febreiro do 2009
Carballo pon a disposición dos veciños e veciñas do municipio un espazo na casa consistorial, así como dous membros do persoal do Concello, para axudar na tramitación das solicitudes de axudas como compensación dos danos causados polo temporal que asolou a comarca os pasados días 23 e 24 de xaneiro. Os interesados e interesadas poden acudir á sala de xuntas do segundo andar do concello en horario de 9.00 a 14.00 horas, onde recibirán información e atención personalizada. Tamén pode obterse máis información sobre as axudas a través das ordes publicadas no DOG do 3 de febreiro.
IGUALDADE E BENESTAR
Martes 3 de febreiro do 2009
O goberno carballés vén de aprobar en Xunta de Goberno Local un convenio de colaboración e cooperación entre o Concello e a asociación de inserción laboral Mulleralia para a xestión dun Banco de Tempo municipal. Este acordo ten unha vixencia de tres anos e a medida será coordinada pola Concellaría de Igualdade que dirixe Lourdes Rey. Está previsto que o Banco de Tempo conte coa súa sede nun dos espazos do primeiro andar do ambulatorio vello da capital municipal, que será acondicionado para o desenvolvemento da medida, desenvolvida por un axente de tempo. O Concello actúa como promotor da iniciativa e proporciona o local, mentres que Mulleralia xestiona os gastos de persoal e supervisa o correcto funcionamento do Banco.
XUNTA DE GOBERNO LOCAL
Luns 2 de febreiro do 2009
A Xunta de Goberno Local reunida en sesión ordinaria o 2 de febreiro vén de adxudicar de xeito provisional os contratos para a dotación da segunda fase do proxecto 'Saneamento en Paradela e depuradora, parroquia de Sofán' e da segunda fase da 'Rede de saneamento en Cances da Vila, parroquia de Cances'. As dúas actuacións están incluídas no Plan de Cooperación Provincial (PCP) adicional e suman un importe de 119.248 euros, cun investimento de 73.080 euros no caso de Paradela e de 46.168 no de Cances da Vila. En ámbalas dúas actuacións, o prazo de execución previsto para a realización dos traballos é de seis meses.
FORMACIÓN E DESENVOLVEMENTO SOSTIBLE
Venres 30 de xaneiro do 2009
O Fórum Carballo vén de vivir a súa presentación en sociedade co obxectivo de converterse nun proxecto de cohesión territorial que a través da innovación e a creación de emprego poida transformarse nun axente dinamizador do barrio da Milagrosa, de Carballo e dos 70.000 habitantes da comarca de Bergantiños, poñendo en marcha iniciativas que incrementen a competitividade do tecido produtivo da área de influencia de Carballo. O proxecto finánciase cos fondos europeos Feder (Fondo Europeo de Desenvolvemento Rexional) o que, en verbas do Tenente de Alcalde, José Antonio Viña, supón abrir "unha nova vía" xa que o Concello concorreu "nunha convocatoria europea con éxito por primeira vez". O Alcalde, Evencio Ferrero, subliña a aposta do Fórum pola sostibilidade ambiental e territorial nun "proxecto de futuro".
VENRES 30 DE XANEIRO E DOMINGO 1 DE FEBREIRO
Xoves 29 de xaneiro do 2009
A programación dos Venres Culturais para esta fin de semana céntrase fundamentalmente no teatro. O venres 30 de xaneiro a compañía santiaguesa Bacana representa o musical 'Hendaya mon amour' a partir das 21.00 horas, con protagonistas como Adolfo the Hit 'Fito', ou Francisco Frango 'Paco'. O domingo 1 de febreiro, neste caso ás 18.00 horas, continúa o ciclo 'En familia' coa compañía La tirita de teatro, que chegada dende Albacete fai a súa particular versión de monicreques de 'El Romeo y la Julieta'. As dúas actuacións son no auditorio do Pazo da Cultura.
SESIÓN PLENARIA
Mércores 28 de xaneiro do 2009
A corporación carballesa aprobou por unanimidade de tódolos grupos -na sesión plenaria ordinaria do 26 de xaneiro- unha moción na que se solicita á Consellería de Medio Ambiente e Desenvolvemento Sostible que realice as actuacións necesarias para a recuperación e posta en servicio do Refuxio de Pescadores de Bértoa como responsable deste enclave. Trátase dun lugar que durante moito tempo ten sido punto de encontro para os pescadores e para as familias carballesas, e que nos últimos tempos ten caído no desuso. O obxectivo é acondicionar e recuperar este espazo.
VENRES 30 DE XANEIRO ÁS 12.00 HORAS
Mércores 28 de xaneiro do 2009
O complexo da Casa dos Oficios do barrio da Milagrosa acolle o venres 30 de xaneiro ás 12.00 horas a presentación para os veciños e veciñas do Proxecto Fórum Carballo, unha iniciativa que busca a mellora competitiva, o fomento do emprego e o desenvolvemento sostible no marco do tecido produtivo de Bergantiños. O Proxecto Fórum ten como obxectivo ser un dinamizador socio económico do municipio e supón un investimento total de 4.658.185 euros que será aportado na súa maioría a través dos fondos Feder (Fondo Europeo de Desenvolvemento Rexional) con 3.260.729 euros, e nun 30 por cento polo Concello, con 1.397.455 euros.
SESIÓN PLENARIA
Martes 27 de xaneiro do 2009
O goberno carballés sacou adiante -en sesión plenaria ordinaria celebrada o 26 de xaneiro- o orzamento de Carballo para o ano 2009 por un importe de 26,7 millóns de euros, as contas máis altas na historia do Concello que ademais supoñen un incremento dun 25 por cento respecto ás do ano 2008. Os investimentos reais rondan os dez millóns de euros e recollen proxectos como a creación dun novo mercado municipal, a construción da Casa dos Oficios, a mellora da travesía de Malpica ou a creación dun edificio de usos múltiples no polígono industrial de Bértoa. O orzamento conta, así mesmo, cunha operación de crédito de 2,5 millóns de euros destinada a financiar os proxectos con cargo aos recursos propios do Concello.
SANIDADE
Martes 27 de xaneiro do 2009
O Servizo Galego de Saúde, a través da Xerencia de Atención Primaria da Coruña, vén de anunciar a incorporación, dende o pasado día 20 de xaneiro, de dous novos médicos de familia ao cadro de persoal do Centro de Saúde de Carballo. Así, a Xerencia está levando a cabo no Concello actuacións dentro do desenvolvemento do Plan de Mellora de Atención Primaria 2007-2011 co obxectivo de potenciar o servizo en Carballo e facilitar unha mellor atención nas instalacións da rúa Ambulatorio.
.jpg)
