SERVIZOS E MEDIO AMBIENTE
Xoves 19 de febreiro do 2009
O Concello de Carballo lembra aos veciños e veciñas que o depósito de lixo como mobles, colchóns, electrodomésticos ou outro tipo de voluminosos na rúa ou nun dos colectores para recollida domiciliaria -de orgánicos, vidro, de envases ou papel- pode implicar unha sanción de ata 500 euros, segundo se recolle na Ordenanza de Limpeza. De feito, neste momento estanse estudando algúns casos que, por reiterativos, serán obxecto de sanción. Os cidadáns que queiran desfacerse deste tipo de residuos deben facelo unicamente no Punto Limpo ou a través do Punto Limpo Móbil.
EDUCACIÓN: ESCOLAS UNITARIAS
Mércores 18 de febreiro do 2009
A Concellaría de Educación de Carballo que dirixe Mar Eirís invita aos veciños e veciñas que o desexen á proxección da longametraxe documental 'A outra escola' de Nemedón Produccións Audiovisuais. A cita é o xoves 19 de febreiro ás 19.00 horas no auditorio do Pazo da Cultura. Boa parte deste documental tense rodado no CRA (Colexios Rurais Agrupados) Ponte da Pedra, na Escola Unitaria da Rega (na imaxe), en Bértoa. O obxectivo da película é contar a historia do primeiro contacto dun grupo de nenos e nenas co mundo educativo, a importancia dos seus profesores e a importancia da escolarización no seu medio natural.
OBRAS E SERVIZOS
Mércores 18 de febreiro do 2009
Un grupo de rapaces e rapazas do centro especial Aspaber do Concello de Carballo está traballando na limpeza do paseo do Anllóns en todo o seu percorrido, dende A Milagrosa, na capital municipal, ata o cemiterio de Bértoa. Os labores consisten na retirada de herbas e vexetación dos bordes do carreiro do paseo de xeito manual, de forma que se evita o emprego de herbicidas prexudiciais. Os traballos, que durante esta semana transcorren no Bosque do Añón, estanse realizando nas dúas marxes do río.
BENESTAR
Martes 17 de febreiro do 2009
O Concello de Carballo xa conta co servizo de transporte adaptado do 065. Con esta iniciativa, as persoas dependentes ou con discapacidades poden achegarse aos centros de saúde ou sociais e cubrir as súas necesidades de desprazamento, o que lles permite levar unha vida máis autónoma e normalizada, con independencia do seu lugar de residencia. Os destinatarios son os veciños e veciñas residentes no Concello, que teñan recoñecida a súa situación de dependencia, en calquera os seus graos, ou de discapacidade -a partir do 65 por cento- e acreditada a súa imposibilidade de utilizar medios de transporte colectivos.
XUNTA DE GOBERNO LOCAL
Luns 16 de febreiro do 2009
A Xunta de Goberno Local reunida en sesión ordinaria o 16 de febreiro vén de aprobar o proxecto de 'Ampliación de rede de colectores en Razo', que conta cun orzamento de 231.997 euros. Trátase dunha actuación que acaba de pasar a supervisión de Augas de Galicia e que agora recibe a ratificación por parte do Concello. Augas de Galicia será o organismo encargado dos traballos, que servirán para ampliar o sistema de saneamento e abastecemento de augas xa existente na parroquia carballesa.
TRÁFICO
Luns 16 de febreiro do 2009
As rúas Río Sar e Santa Eufemia da capital municipal carballesa serán de sentido único a partires do mércores 18 de febreiro. A primeira destas vías está situada entre a avenida de Fisterra e a Avenida da Milagrosa, mentres que a Santa Eufemia está situada ao final da Gran Vía en paralelo á avenida de Bértoa. O concelleiro de Tráfico, Benedito Viña, explica que esta última rúa será de sentido único en dirección A Coruña, e poderá empregarse como incorporación á estrada comarcal AC-552. No caso da Río Sar, o acceso será tamén dende a vía comarcal -á altura da avenida de Fisterra- cara ao barrio da Milagrosa e a zona dos Xulgados.
CULTURA
Venres 13 de febreiro do 2009
O programa do Antroido 2009 nace coa vontade de "crear un ambiente festivo para unha festa de rúa". Así o manifestou a Concelleira de Cultura, Belén Lendoiro, durante a presentación das actividades que se desenvolverán entre os días 20 e 24 de febreiro para honrar a Don Carnal. Entre as apostas deste ano, destaca un espectáculo de pirotecnia, música e baile a cargo de Troula Animación, o xa tradicional Concurso de disfraces, comparsas e carrozas do domingo de Antroido e o recuperado Enterro da Sardiña, ademais dos bailes, obradoiros e actividades dirixidas especialmente para os máis cativos e cativas.
CULTURA
Xoves 12 de febreiro do 2009
A programación dos Venres Culturais continúa no Pazo da Cultura de Carballo, neste caso co teatro e coa maxia. O venres 13 é a actuación do mago Martín Camiña, que presenta o espectáculo 'Feitizo', no que se mesturan a maxia, o humor e a participación do público. Con ingredientes como as cartas, o escape da camisa de forza, a folla da guillotina, panos, cigarros, xornais, espadas ou billetes, Martín Camiña constrúe a súa actuación, especialmente dirixida para adultos. Por outra banda, o domingo 15 de febreiro a compañía Katarsis presenta o seu espectáculo 'Pacama', que está dirixido exclusivamente para nenos e nenas de entre 1 e 3 anos.
MEDIO AMBIENTE E DESENVOLVEMENTO SOSTIBLE
Martes 10 de febreiro do 2009
O organismo autónomo Augas de Galicia, dependente da Consellería de Medio Ambiente e Desenvolvemento Sostible, ten en marcha proxectos no Concello de Carballo por preto de nove millóns de euros. Así o expresou o Secretario Xeral da Consellería e Presidente de Augas de Galicia, Jorge Antonio Santiso Blanco, durante unha visita institucional na que estivo acompañado polo delegado provincial de Medio Ambiente, Manuel Tajes. Nestes momentos están en execución actuacións en Razo e Baldaio e vén de ser adxudicado no Consello da Xunta un novo proxecto en Ardaña. Así mesmo, están en tramitación novas actuacións en Baldaio e na rúa Sol da capital municipal.
PROMOCIÓN ECONÓMICA
Luns 9 de febreiro do 2009
O Concello de Carballo, a través da Concellaría de Promoción Económica que dirixe Xosé Manuel García Guillín, organiza o mércores 11 de febreiro unha sesión informativa á que invita a tódolos empresarios e empresarias interesados, así como aos veciños e veciñas que o desexen, para falar da ampliación, así como do proceso para a adxudicación de parcelas que está aberto nestes momentos no parque empresarial de Bértoa. A cita é a partir das 20.00 horas no salón de actos da Casa da Xuventude da capital municipal. Está previsto que asistan a esta xuntanza técnicos e representantes de Xestur Coruña SA, entidade encargada do desenvolvemento do polígono carballés.
VENRES CULTURAIS
Venres 6 de febreiro do 2009
O venres 6 de febreiro continúa a programación dos Venres Culturais, neste caso co ciclo Docespop, que principia co concerto do artista Hendrik Röver. Despois dunha traxectoria vital unida a Los Deltonos, o cantante, guitarrista e compositor cántabro dálle renda solta ás súas inquedanzas máis persoais no seu primeiro disco en solitario, titulado 'Esqueletos', no que recolle composicións que leva facendo dende hai tempo. A cita é ás 21.00 horas no auditorio do Pazo da Cultura carballés.
CULTURA
Venres 6 de febreiro do 2009
O sábado 31 de xaneiro as 10.30 horas reuniuse no Pazo da Cultura de Carballo o xurado do XI Certame Fotográfico Xosé Manuel Eirís para fallar os premios do concurso, que nesta edición teñen un importe de 1850 euros. Este ano teñen participado 180 fotografías realizadas por 93 fotógrafos, resultando gañadora do primeiro premio, dotado con 700 euros e diploma, a fotografía denominada 'Sen título', presentada por Javier Arcenillas Pérez. O segundo premio foi a parar a mans de Esteban R. Léyton, tamén cun traballo 'Sen título', que gaña 450 euros e un diploma.
.jpg)