SÁBADO 30 DE XUÑO E DOMINGO 1 DE XULLO
Xoves 28 de xuño do 2012
As festas de San Xoán 2012 pechan cunha das súas citas máis importantes, unha romaría de veciños e veciñas que dende hai uns anos marca sempre o final das celebracións: a Festa do Bosque. O Bosque do Añón convértese o domingo 1 de xullo no espazo onde os carballeses e carballesas desfrutan coa familia e os amigos dun amplo programa de actividades para todas as idades. A cita principia oficialmente ás 12.30 horas, aínda que a primeira das actuacións musicais está programada na sesión Vermú co Dúo Época, ás 13.00 horas; pola tarde, toca o Grupo de Gaitas de San Cristovo; e a partir das 20.00 horas haberá un concerto de música tradicional. Ás 22.00 horas é a quenda da música de Versión Imposible e pechan a festa a partires das 23.00 horas Lobishome e Metralletas Lecheras. Ademais da música, non hai que esquecer o tradicional Concurso de Sobremesas, patrocinado por Pastelaría San Luís a partires das 16.30 horas; e a 116ª edición do Campionato Mundial de baixada de augas doces de barcos de papel, ás 18.30 horas. Tamén haberá xogos populares ás 17.30 horas. Un programa moi completo que este ano verase lixeiramente alterado pola instalación dunha pantalla xigante para retransmitir ás 20.45 horas a final da Eurocopa 2012, na que compite a selección española despois de clasificarse vencendo a Portugal.
DOAZÓN DO PADROADO DA CULTURA GALEGA DE MONTEVIDEO
Martes 26 de xuño do 2012
O Alcalde de Carballo, Evencio Ferrero, vén de recibir en representación do Concello tres tomos da primeira edición da obra "Historia de Galiza", coordinada por Ramón Otero Pedrayo, que se publicou entre os anos 1943 e 1956 e da que non hai moitos exemplares. Recolleu estas "xoias", como así as denominou, da man de Ana Lorenzo, presidenta do Padroado da Cultura Galega de Montevideo, e de Antonio García de Seárez, director do programa radiofónico de gran sona "Sempre en Galiza". Foi un "acto simbólico", en verbas de Ana Lorenzo, xa que "esta obra foi feita na emigración e volve como unha forma de unir ás dúas Galicias: a da terra e a que está espallada polo mundo e que é parte desta Galicia tamén". Para Toni de Seárez esta "Historia de Galiza" constitúe un traballo "emotivo", porque "foi feita con moito sacrificio e amor á terra", cando na época franquista "un grupo de bos e xenerosos pensaron que a mellor defensa da nosa terra era a cultura". O traballo comezou a elaborarse en Bos Aires, e debido a súa prolixidade (só o prólogo de Vicente Risco ocupa 135 follas) unicamente se conservan tres tomos, aínda que de tamaño considerable, como chanceaba a bibliotecaria municipal ao collelos para trasladalos ao Arquivo. Ferrero expresou o agradecemento do pobo carballés por esta doazón. "Sentímonos moi honrados e privilexiados", rematou.
ESTAS ENSEÑAS SON CONCEDIDAS POLA ASOCIACIÓN ADEAC
Martes 26 de xuño do 2012
A Bandeira Azul, un distintivo que concede a ONG Asociación de Educación Ambiental e do Consumidor (ADEAC), ondea dende o venres 22 de xuño nos areais de Pedra do Sal e As Saíñas do municipio carballés. Este símbolo recoñece a calidade das praias, así como das súas augas, ademais dos servizos que ten dispoñibles, como o de duchas, áreas de estacionamento, xestión ambiental, seguridade e en xeral as instalacións das que dispoñen os areais, atendendo á accesibilidade, ao feito de que exista recollida selectiva, ao servizo de salvamento e socorrismo, etc. As enseñas foron recollidas o mesmo venres na Rapadoira (Foz) polo Concelleiro de Medio Ambiente, Marcos Trigo, nun acto no que estivo presente o presidente da Xunta de Galicia, Alberto Núñez Feijóo. Unha vez en Carballo, o Alcalde, Evencio Ferrero, foi o encargado de proceder ao izado das enseñas acompañado do propio Marcos Trigo e de socorristas e membros de Protección Civil, nunha tarde na que o sol foi o protagonista para acompañar ao segundo día do verán. Para que un areal poida conseguir a Bandeira Azul é preciso realizar numerosos controis, entre os que destacan as análises periódicas das augas. Hoxe en día a campaña da Bandeira Azul desenvólvese anualmente en máis de 40 estados de cinco continentes, incluíndo a práctica totalidade dos estados da Unión Europea.
LEVOUSE A CABO O PULIDO, VERNIZADO E PINTADO DA CANCHA
Venres 22 de xuño do 2012
O Concello de Carballo informa de que veñen de rematarse os traballos para reformar o Pavillón Vila de Noia da capital municipal, que se centraron na renovación da cancha de xogo. Dende a inauguración do edificio, no ano 1988, non se teñen realizado nigún tipo de melloras na pista, que se atopaba bastante deteriorada polo intenso uso das instalacións a pesares da boa calidade do material. Os labores principiaron co lixado e pulido do antigo pavimento, para despois prodecerse á redistribución das liñas de todos os campos (de baloncesto, balonmán, fútbol sala e voleibol) para delimitar as dimensións dos terreos de xogo segundo a normativa que marca o regulamento específico de cada disciplina deportiva. Despois realizouse o vernizado da superficie da cancha, de 42 por 25 metros, na que tamén se incluíu no centro o logotipo de Carballo Deporte. Finalmente, realizouse un novo pulido superficial para despois botar unha última capa de verniz. As características do parqué da pista do pavillón favoreceron a calidade do acabado. Os traballos duraron preto de dúas semanas, e escolléronse as datas por ser unha época na que xa están rematadas as competicións deportivas oficiais e na que aínda non principiaron nos pavillóns as actividades propias do verán, a piques de botar a andar.
SERÁN DO 2 DE XULLO AO 31 DE AGOSTO NO CEIP A CRISTINA
Venres 22 de xuño do 2012
O programa Concilia, unha iniciativa que pretende favorecer a conciliación da vida laboral e familiar dos pais e nais dos alumnos e alumnas dos centros escolares carballeses de Infantil e Primaria, ofrece por terceiro ano consecutivo a posibilidade durante os meses de xullo e agosto de que os rapaces e rapazas estean atendidos polas mañás, entre as 10.00 e as 14.00 horas, grazas á colaboración coa empresa Axiña Servizos Deportivos. Así, do 2 ao 31 de xullo e do 1 ao 31 de agosto de luns a venres, os cativos e cativas inscritos terán a posibilidade de realizar actividades físicas e deportivas e culturais, con xogos populares, de psicomotricidade, deportes alternativos, tiro con arco, pirámide multideportiva, actividades de orientación ou contacontos motores. Tamén poderán participar en obradoiros de debuxo ou de reciclaxe, así como afondar nas novas tecnoloxías e recibir nocións de inglés. As actividades desenvolveranse nas instalacións do CEIP A Cristina da capital municipal e o Concilia ofrece a posibilidade de que os cativos e cativas tamén estean antendidos entre as 7.30 e 10.00 horas como ocorre durante o trancurso do curso escolar. As Actividades de Verán do programa Concilia están organizadas polo Concello, a través do Departamento de Servizos Sociais, coa colaboración da Deputación provincial e a Secretaría Xeral de Igualdade da Xunta.
DOMINGO 24 E LUNS 25 DE XUÑO
Venres 22 de xuño do 2012
O domingo 24 é o día grande das festas de San Xoán, e para ese día está reservado un dos principais atractivos do programa, a actuación da artista Pastora Soler. Despois da tradicional misa solemne e procesión da mañá, chega o igualmente tradicional concerto central das festas. Pastora Soler é unha artista sevillana que comezou a súa carreira en 1994 coa copla, un xénero que aínda lle segue influíndo nas súas cancións e interpretacións. Porén, hoxe en día céntrase máis no pop e nas baladas, pero sen esquecer as súas orixes flamencas. En 2010 celebrou os seus 15 anos no mundo da música cun álbum recopilatorio e obtivo varias nominacións aos Grammy Latinos. En 2011 saca o seu undécimo disco, "Una mujer como yo", co que todavía está de xira e xa en 2012 acadou grandes cotas de popularidade ao participar no festival de Eurovisión e conseguir unha meritoria décima posición. Ademais dos seus grandes éxitos, de seguro que durante a súa actuación volverá a cantar a canción que tan ben interpretou en Baku (Azerbaián) e que foi moi aplaudida polo público do festival e escoitada por 9 millóns de españoles na televisión pública: "Quédate conmigo". A cita é no palco da praza do Concello a partires das 23.00 horas. Cando remate o concerto, sobre as 00.30 horas, continuará a música coa verbena a cargo da osquestra Los Trovadores.
VENRES 22 E SÁBADO 23 DE XUÑO
Xoves 21 de xuño do 2012
O autor, director de escena, narrador oral, e actor galego Cándido Pazó é o encargado este ano de marcar o comezo das Festas de San Xoán coa lectura do pregón. Recoñecido polo FIOT (Festival Internacional Outono de Teatro) como Xograr de Outono, ten unha estreita relación con Carballo, ademais de ter actuado na vila en numerosas ocasións. A última vez este mesmo ano coa excelente peza "Memorias das memorias dun neno labrego", moi aplaudida polo público. A cita é hoxe, martes 21 de xuño a partires das 21.00 horas, despois do tradicional concerto da Banda Municipal. A orquestra D'Tacon pecha a noite coa primeira verbena das festas. Porén, o primeiro prato forte musical do programa é o festival Rockin, unha das citas que máis público xuvenil ten congregado en anteriores edicións e que regresa este 2012 despois de estar ausente do cartel. Están convidados os grupos carballeses Lowcos e Franc3s, e os ourensáns Burgas Beat. A organización lamenta a baixa de última hora dos cabeza de cartel, os estadounidenses The Blasters, que xustifican a súa ausencia por unha enfermidade do seu vocalista, Phil Alvin, que provocou a súa hospitalización. Porén, estase tentando cubrir esta baixa, aínda que de non ser así, o festival seguirá a súa andaina como estaba previsto. A cita é o venres 22 no Rego da Balsa (nunha carpa situada detrás da antiga estación de autobuses) a partires das 22.00 horas.
A ACTIVIDADE PECHOUSE O SÁBADO 16 CUNHA EXHIBICIÓN
Mércores 20 de xuño do 2012
Boa parte dos participantes no "Programa de Exercicio Físico para Maiores" do Concello de Carballo veñen de pechar o curso nunha sesión dirixida de exercicios físicos no Pavillón Carballo Calero celebrada o sábado 16 de xuño. Esta actividade está organizada polo Concello de Carballo a través das concellarías de Deporte e Terceira Idade e conta coa colaboración da Deputación da Coruña a través de programas de subvencións para proxectos de envellecemento activo. Ao longo do presente curso 2011-12 realizáronse dúas sesións semanais de exercicio físico cos obxectivos xerais de influír na poboación maior conseguindo estilos de vida activos e saudables e manter ou mellorar a calidade de vida da poboación maior mediante a actividade física e a inserción social actuando sobre o proceso natural de envellecemento. Os participantes totais foron 481 o que supón un incremento da participación dun 5 por cento con respecto ao curso anterior. Distribúense en 18 grupos de actividade, estando no pavillón Vila de Noia sete grupos cun total de 231 usuarios. Os restantes 11 lugares de actividade están nas parroquias de Berdillo, Cances, Entrecruces, Imende, Noicela, Oza, Razo, Rus-Outón, Rus-Ramil e Sofán, acudindo 250 alumnos, de xeito que a participación distribuíuse case ao cincuenta por cento entre o medio rural o núcleo urbano.
NO ANDAR -1 ATÉ O 30 DE XUÑO
Mércores 20 de xuño do 2012
A contorna e as paisaxes da comarca -que lle serven de inspiración-, a amizade e contactos que mantén na zona a través da Coral Polifónica de Bergantiños e a boa comida son os tres motivos principais esgrimidos polo artista catalán Francesc Aloy para presentar no Pazo da Cultura a exposición "Rincóns de Carballo e Costa da Morte". Trátase dunha mostra composta por unha serie de pinturas cunha temática realista, impresionista e figurativa na que se recollen procedementos ao óleo, acuarela e cerámica e na que o público poderá desfrutar de diferentes paisaxes da nosa bisbarra cun particular tratamento da cor e a luz. Francesc Aloy coñece Carballo mediante un intercambio coa Coral Polifónica de Bergantiños, colaboradora desta exposición, e dende ese momento comeza a súa relación co municipio. Este autor, que posúe un amplo currículo as súas espaldas, comeza a súa carreira artística nos anos 70 e a partir de entón realiza máis de 140 exposicións en distintos lugares de España e países como: Italia, Inglaterra, Portugal, Rumania, Canadá, Uruguai, Arxentina ou Francia. Os interesados e interesadas en visitar a mostra ou incluso en adquirir algunha das obras colgadas dos muros da sala de exposicións do andar -1 do Pazo, poden facelo no horario habitual de 18.00 a 21.00 horas até o sábado 30 de xuño.
A CAPACIDADE RESIDENCIAL PREVISTA ACADARÍA AS 26.400 VIVENDAS
Mércores 20 de xuño do 2012
A Comisión de Urbanismo vén de manter unha xuntanza na que se estableceron os criterios cos que se vai a traballar para adaptar o documento do Plan Xeral de Ordenación Municipal (PXOM) de Carballo ao informe previo á aprobación inicial realizado pola Secretaría Xeral de Ordenación do Territorio e Urbanismo da Xunta de Galicia, o organismo responsable, en última instancia, da ratificación do documento. O equipo redactor do PXOM informou destas directrices entre as que se atopa a de non renunciar a un concepto de cidade e a de tratar de manter un equipamento mínimo de futuro, así como establecer unha rede viaria estruturada e respectar e delimitar as zonas verdes e espazos de ocio. Mantendo estas pautas, acordouse a redución da capacidade residencial inicial, prevista en 30.000 vivendas, a 26.400, aínda que a rebaixa non chega ás 20.000 propostas polo informe previo da Xunta. Segundo explica a Concelleira de Planificación e Desenvolvemento Urbano, Milagros Lantes, os técnicos consideran que unha redución maior no número de vivendas non sería sostible, xa que o número acordado de 26.400 xorde tan só de consolidar os proxectos existentes e completar zonas de espazos urbanizables que están a medias. Engade que se elaborará unha xustificación acerca desta decisión porque o obxectivo é "non crear un PXOM incoherente".
OS FEITOS FORON POSTOS EN COÑECEMENTO DO SEPRONA
Martes 19 de xuño do 2012
O Concello de Carballo, a través das concellarías de Servizos e de Medio Ambiente, vén de denunciar un delicto ecolóxico producido na contorna do Paseo do Anllóns. Así, algunha persoa ou persoas sen ningún tipo de conciencia cívica veñen de crebar arredor de 20 árbores que a Brigada de Medio Ambiente e a Sociedade Venatoria de Bergantiños viñan de plantar recentemente de forma conxunta nas marxes do río para rehabilitar a canle e loitar contra unha praga que estaba afectando aos ameneiros e minguando ás árbores de ribeira. Hai que subliñar que o Concello carballés realiza de forma cotiá labores de mantemento, conservación e posta en valor da ribeira do río Anllóns e do seu paseo e colabora con asociacións de carácter ecolóxico, ademais de por iniciativa propia, no repoboamento e ornamentación destas zonas coa plantación de árbores autóctonas. A administración local quere denunciar este ataque a un ben colectivo e a un recurso natural e vén de poñer os feitos en coñecemento da Policía Local, do Servizo de Medio Ambiente da Consellería de Medio Rural e do Seprona (Servizo de Protección da Natureza da Garda Civil). O Concello pide a colaboración dos veciños e veciñas para perseguir este tipo de accións e informa de que se porán en marcha todos os medios necesarios para atrapar aos culpables e sancionalos por incorrer nun delicto ecolóxico.
ANÁLISE DA SITUACIÓN DO SECTOR
Luns 18 de xuño do 2012
A Mesa Local de Comercio de Carballo vén de manter unha xuntanza na que un dos puntos da orde do día foi a aprobación do calendario de actividades de promoción do Centro Comercial Aberto (CCA) Carballo. A reunión enmárcase dentro do compromiso adquirido na anterior sesión, celebrada en febreiro deste ano, de manter citas periódicas, alomenos cada tres meses, co obxectivo de manter informados aos comerciantes sobre temas municipais que poden ter incidencia na súa actividade, como as reformas incluídas no plan de tráfico do Concello ou as medidas adoptadas para mellorar a mobilidade. De feito, outro dos asuntos abordados na reunión foi o de dar conta da recente ampliación da Zona Azul, que recibiu luz verde no pleno do mes de maio. Así, incorpóranse a marxe esquerda impar da rúa Álvarez de Sotomaior; a marxe dereita par da rúa Gravador Manuel Facal; toda a rúa Barcelona até o cruce coa rúa Luís Calvo; e a rúa Luís Calvo na marxe esquerda dos números 11 (intersección coa rúa Saúde) ao 23, ata un total de 64 novas prazas. Por último, un dos obxectivos da Mesa é o de facer un seguimento da situación do comercio local da vila, especialmente nos momentos actuais de crise, como así se fixo durante a xuntanza, na que se analizaron as circunstancias que vive o sector.
.jpg)