AS OBRAS DA AUTOVÍA CARBALLO-BERDOIAS: EN MARCHA EN SETEMBRO

O Conselleiro de Medio Ambiente visitou a depuradora de Razo, que contou cun investimento de 1,5 millóns de euros

Xoves 13 de maio do 2010

Agustín Hernández foi recibido nas instalacións da EDAR polo Alcalde de Carballo, Evencio Ferrero; o Tenente de Alcalde, José Antonio Viña; así como por outros membros da corporación local. O Conselleiro lembrou algunhas actuacións que se están realizando en materia de saneamento en Carballo, como as EDAR de Baldaio e Ardaña, subliñando a importancia de achegar solucións á depuración, especialmente en zonas próximas a praias como a de Razo-Baldaio, de grande valor medioambiental. Respecto da autovía Carballo-Berdoias, hai que lembrar que esta nova estrada conectará a AG-55 entre A Coruña e Carballo con Baio e Berdoias. Esta vía de alta capacidade servirá de alternativa á comarcal AC-552. A lonxitude do treito en licitación é de 42 quilómetros e o investimento previsto é de 216 millóns de euros. A posta en servizo desta estrada reducirá o tempo do percorrido en case un 40 por cento respecto da duración actual, xa que se pasará de 47 a 29 minutos.

Neste proceso de licitación o prego de contratación inclúe os seguintes documentos: o proxecto de construción da autovía Carballo-Baio con sección e autovía e proxecto de construción do corredor Baio -Berdoias (ata Cee); e o proxecto de construción do desdobramento Baio-Berdoias e a separata coa solución definitiva do enlace de A Pionlla co informe favorable de Patrimonio. Por outra banda, hai que lembrar que esta semana anunciouse a adxudicación da redacción do proxecto da variante de Carballo por 263.000 euros. Este vial, que conta cun orzamento previsto de 14,7 millóns de euros, enlazará coas estradas: AG-55 entre A Coruña e Carballo; AC-552 A Coruña-Cee; e Ordes-Carballo (AC-413). A empresa que se encargará da redacción do proxecto é IDOM SA. O obxectivo da nova vía é circunvalar o núcleo de Carballo e sí desconxestionar a capital municipal, xa que a AC-552 soporta un tráfico medio diario de máis de 9.000 vehículos. A lonxitude da variante será de 6,9 quilómetros, con cinco pasos inferiores e seis superiores, ademais dun viaduto.