A CITA É O 23 DE XANEIRO ÁS 21.00 HORAS

Arrinca o programa dos Venres Culturais coa actuación da Real Filharmonía de Galicia

Xoves 22 de xaneiro do 2009

A Real Filharmonía de Galicia inicia a súa actividade en 1996 no Auditorio de Galicia (Santiago de Compostela), onde presenta a súa tempada estable de concertos, de outubro a xuño. Aínda que ofrece no seu ciclo todo o repertorio sinfónico, a RFG destaca polas súas interpretacións do repertorio musical clásico e de principios do romanticismo, propio do seu tamaño orquestral, e que se debe fundamentalmente ao labor que desenvolveron os directores titulares cos que contou ata hoxe: Helmuth Rilling, desde 1996 ate o ano 2000, traballou partindo do repertorio sinfónico clásico austro-alemán; e Antoni Ros Marbà, desde o ano 2000, afondou nesa liña.

O director e pianista compostelán, Maximino Zumalave, será o encargado de dirixir á Real Filharmonía. Formouse musicalmente en Santiago, Madrid, Viena e Stuttgart. Foi discípulo de Ángel Brage, Rosa Sabater, Guillermo González, John Elliot Gardiner e Helmuth Rilling. Fundador e director do Coro Universitario de Santiago e do Collegium Compostellanum, principal director invitado da Orquestra Sinfónica de Galicia (1992-1995) é tamén director asociado da Real Filharmonía de Galicia, formación da que foi fundador. A entrada para desfrutar do talento tanto do director como da agrupación é de balde, aínda que con previa invitación que se pode recoller nas oficinas de Cultura do Pazo.