O PSOE APOIA AO BNG E PP E TEGA AOS SEUS RESPECTIVOS CANDIDATOS

Evencio Ferrero acada a maioría na súa reelección como alcalde de Carballo

Sábado 16 de xuño do 2007

O salón de plenos do Concello de Carballo ateigouse de xente para a toma de posesión dos novos concelleiros e a investidura do alcalde. Manuel Andrade Cristóbal (concelleiro electo de maior idade), que conformou a mesa encargada de dirixir o acto xunto con Marcos José Trigo Facal (o máis novo), encargouse de abrir a sesión felicitando a todos os membros da nova corporación. De seguido, e comezando pola formación que máis votos acadou, xuraron o seu cargo mediante a fórmula legalmente prevista os 21 concelleiros electos:

Polo BNG:

Evencio Ferrero Rodríguez
Belén Lendoiro Esmorís
Luís María Lamas Álvarez
María Dores Silveira Sande
José Manuel García Guillín
María Lourdes Rey Fau
Benedicto Viña Costa
María Mar Eirís Villar
Marcos José Trigo Facal

Polo PP:

Alberto Sueiro Pastoriza
Ramón Antelo Veiga
Margarita Varela Lema
Juan Carlos Castro Pombo
María Esperanza Pan Collazo
Jesús Ricardo Serrano Tasende

Por TEGA:

Manuel Andrade Cristóbal
María Asunción Méndez Vilalta
Ramón Eirís Pérez

Polo PSOE:

José Antonio Viña Patiño
María Jesús Vázquez Vázquez
María Manso Cid

Acto seguido, e despois de que os voceiros de cada grupo proclamasen como candidatos aos seus respectivos cabezas de lista -coa excepción do PSOE-, procedeuse á elección do alcalde a través dunha votación que finalizou con 12 votos a prol de Evencio Ferrero Rodríguez, 6 a favor de Alberto Sueiro Pastoriza e 3 en apoio de Manuel Andrade Cristóbal.

Chamamento ao diálogo e á participación
Logo de recibir o bastón de mando do Concello no medio dun cálido aplauso, Evencio Ferrero tivo palabras de agradecemento para o conxunto dos cidadáns de Carballo e dos membros da corporación e, na liña do seu discurso de investidura do ano 2003 (no que recordara aos alcaldes carballeses que o precederon), quixo nesta ocasión facer unha mención especial a Jacinto Carballo Lea como "proba do recoñecemento e respecto a un alcalde que aínda hoxe segue sendo lembrado por todos os veciños".

Na súa intervención, o novo alcalde de Carballo recordou o compromiso do seu goberno co desenvolvemento dun regulamento de participación cidadá para conseguir que "os cidadáns sexan os protagonistas da política municipal" e contando tamén coa axuda de toda a corporación, á que enviou "unha oferta de diálogo e participación". Do mesmo xeito, manifestou o seu desexo de poder ter en fronte a "unha oposición construtiva" e marcou como obxectivo prioritario desta nova lexislatura a consecución dun acordo en materia de urbanismo.

Evencio Ferrero pechou a súa intervención desculpándose polos erros cometidos, sinalando que "neses erros e acertos seremos outra vez avaliados", e facendo un chamamento á unidade das diferentes forzas políticas "para construír o Carballo vivo, dinámico, activo e emprendedor que todos e todas desexamos".