Concello de Carballo

Asociación Cultural Argazo

A Asociación Cultural Argazo nace no ano 1982 de mans dun grupo de veciños e veciñas de Baldaio interesados en dinamizar culturalmente a zona. Moitos deles levaban xa anos formando parte doutras asociacións dedicadas a variadas actividades. Entre elas, o baile e a música tradicional galega. Será por iso que Argazo destacou sempre nese camiño sen esquecer, por suposto, outras moitas actividades que contribuíron a animar e divertir ás xentes "da baixa". Entre elas, as cabalgatas de Reis, festas dos socios e socias, bailes de salón, actividades de Nadal para nenos e nenas, visita de Papá Noel, chocolatadas, churrascadas, encontros, festivais, obras de teatro, representacións de nacementos na igrexa, excursións, etc.

Pero foi sen dúbida o grupo de música e baile tradicional o que máis éxito tivo, tanto dentro como fóra do noso país. Comezouse representando a Baldaio nas distintas festas parroquiais da zona, como San Miguel de Vilela, o San Ramón, o Sacramento e a Inmaculada de Noicela ou a Vixilia Xove de Rebordelos. Tamén nos concellos da contorna como A Laracha, Arteixo, A Coruña, Coristanco, Malpica, etc., para despois irse abrindo a outros de terras de máis lonxe, sempre sen descoidar Baldaio e a súa xente. Así, Argazo percorreu de norte a sur e de este a oeste a terra portuguesa e grande parte da península como Cidade Real, Barcelona, Valladolid, Cáceres e Asturias. E chegando tamén a Francia e Suiza en distintas ocasións.

Argazo foi considerado un dos grupos máis representativos da comarca de Bergantiños, formando parte do Consello Municipal de Cultura e como invitado na maioría dos actos culturais desenvolvidos na comarca: o Verán Cultural de Carballo, a Mostra da Olería de Buño, distintos eventos a favor de damnificados por catástrofes naturais como os do furacán Mitch, etc.

Ademais, Argazo achegou a Baldaio e Carballo moitos dos grupos etnográficos cos que mantivo contacto ao longo da súa historia, facendo así que, espectáculos que doutra maneira nunca chegarían aquí, puidesen ser admirados polos veciños e veciñas. Danzas bretonas, mallaos portugueses, jotas cacereñas, sardanas barcelonesas, jotas e outras danzas castellanas, etc.

Despois dun parón de catro anos, Argazo volveu a poñerse en marcha. Sen présa pero sen pausa, retomando as actividades de baile e música tradicional e tentando ofrecer aos veciños e veciñas "da baixa" e a todos aqueles outros que así o desexen, un maior número de actos e actividades en que investir o seu tempo de lecer.

Un novo comezo cheo de iniciativas e esperanzas.

As xentes