Concello de Carballo

Carballo é un cruzamento de camiños entre a Comarca de Bergantiños, a Costa da Morte, a capital da provincia -A Coruña- e a da comunidade autónoma -Santiago de Compostela-. Esta situación privilexiada fixo que o noso municipio se convertese nun referente comercial onde atopar todo tipo de produtos: agrícolas, gandeiros, do mar ou manufacturados.

Recollendo a tradición

O Carballo máis tradicional déixase ver na feira que se celebra todos os xoves e os domingos -segundos, cuartos e quintos domingos de mes- na Praza do Concello da Vila. Herdeira das antigas feiras de Rus e Berdillo, constitúe o lugar idóneo para quen desexe adquirir os mellores froitos das terras de Bergantiños. O pan de Carballo, as cebolas, os allos, o repolo e as nabizas ou as patacas son só algúns dos produtos frescos que é posible adquirir, listos para ser consumidos con todo o seu sabor.

Complementando a feira está o mercadillo da Milagrosa, que ten lugar todos os domingos de feira na Avenida da Milagrosa, preto do aparcadoiro e do Parque do San Martiño. Nel podemos atopar variados productos para a venda, coma prendas de vestir e téxtil en xeral, produtos para o fogar ou maquinaria agrícola, entre outros.

Dende o ano 2008 o Concello, en colaboración cos diversos sectores empresariais da zona, promove catro Feiróns de tempada, que coinciden xeralmente coas estacións de Primavera, Verán, Outono e Inverno. Así, coincidindo co feirón -ou quinto domingo de mes- os visitantes poden coñecer e desfrutar da oferta agroforestal, comercial e industrial das nosas empresas.

Mercado municipal

No mercado de Carballo poden adquirirse os mellores produtos naturais, acabados de saír da terra e do mar. A praza de abastos ten sido sempre unha locomotora das feiras e do comercio do centro da capital municipal. Nestes momentos, o Concello está inmerso nun proxecto que pretende facer do mercado un espazo moderno, abordando a construción dun novo edificio que permita darlle azos ao comercio do centro e revitalizar a actividade dentro do propio mercado.