Concello de Carballo

"O.V.+G.V.": ATÉ O 3 DE ABRIL NO ANDAR -1 DO PAZO DA CULTURA

O mar da Costa da Morte e o urbanismo de Madrid van da man na exposición do artista carballés Manuel Pazos

04/03/2011 O artista carballés Manuel Pazos expón por primeira vez na súa vila cunha escolma de obras que mesturan a vida mariña e a urbana a través dos colores cambiantes dos polbos da lonxa de Malpica que vía de mozo, como el mesmo explicaba na inauguración da mostra, e a influenza urbanita da cidade de Madrid, onde vive na actualidade. Baixo o nome de "O.V.+G.V.", conta con dúas partes ben diferenciadas. A primeira, "O.V." en referencia ao Octopus Vulgaris, nome científico do polbo, sitúa ao espectador no límite da abstracción e a figuración, utilizando unha peculiar temática na que poden observarse caixas repletas de polbos entrelazados. A segunda, "G.V.", ve a luz por primeira vez en Carballo, e refírese á rúa Gran Vía de Madrid, unha das principais arterias da capital de España que, precisamente en 2010, cumpriu cen anos de vida. Edificios emblemáticos e algunha das vistas máis famosas da cidade quedan plasmadas nun estilo máis realista. A exposición forma parte dunha iniciativa para "fomentar a creatividade e dar a coñecer a artistas locais", segundo explica a Concelleira de Cultura, Belén Lendoiro, que lembrou as palabras do xornalista carballés Henrique Mariño para describir ao autor: "un creador poliédrico, versátil e disperso, dificilmente enmarcable nunha disciplina, nunha técnica, nunha temática".

Durante a inauguración, Manuel Pazos quixo agradecer o apoio de familiares e amigos, así como a colaboración da Concellaría de Cultura na posta en marcha da exposición, e describiu a súa escolma como "un contraste entre o 'rollo' urbanita con algo totalmente enxebre". Con vontade de autocrítica, tamén expresou o seu desexo de que a mostra guste pero "espero que se me tendes que poñer a parir, tamén o fagades". Respecto da súa traxectoria, Henrique Mariño resume as orixes de Pazos como un artista "cun pé sumido na terra e un ollo perdido na vangarda", que "amosou dende ben cedo maneiras renacentistas e dotes para as belas artes". Pazos conta con moitos referentes, como o poeta Lois Pereiro ou o pintor Pedro Cano, a quen lle debe o seu interese pola acuarela, coa que leva anos traballando. Porén, nesta mostra Pazos emprega o acrílico e a técnica mixta, coa introdución de xeles e cargas coas que pretende darlle elasticidade, textura, cor e brillo ás imaxes da lonxa da súa adolescencia. En Madrid plasma o smug, o trafego, a fugacidade, o anonimato e os autómatas transeúntes dunha rúa que atravesa Madrid. Para Mariño, "Pazos resulta un artista clásico, aínda que xogue a situar a súa pintura no límite do figurativo".

O Alcalde de Carballo, Evencio Ferrero, quixo subliñar o "excelente inicio da apertura desta sorprendente exposición", non só polo xeito de plasmar a temática, senón tamén pola natureza da temática en si. "Para que exista a urbanidade tamén é importante que o pobo se meta nas raíces e as orixes, e está ben que non sexan só as da terra, senón tamén as do mar", subliña Ferrero, que felicitou ao artista expresando que "é unha delicia desfrutar de expresións artísticas de persoas que viviron e se criaron entre nós". O Alcalde manifestou, así mesmo, a importancia do Pazo da Cultura como "espazo común" posto a disposición dos artistas e rematou resaltando que "é gratificante poder ver cómo seguen emerxendo importantes valores artísticos de Carballo". A exposición de Manuel Pazos "O.V.+G.V." está no andar -1 do Pazo da Cultura, no horario habitual de 18.00 a 21.00 horas, e pode visitarse até o domingo 3 de abril. Esta cita forma parte do ciclo de exposicións do programa dos Venres Culturais 2011.

Volver