Promoción Económica

Se ti tamen es “Máis de Carballo que o pan”, participa no concurso de postais do Día do Pan

Martes 19 de setembro do 2023 Promoción Económica

Chega a terceira edición de Máis de Carballo que o pan, e chega con novidades. Despois de reunir nas dúas coleccións anteriores os deseños de numerosos artistas locais, este ano convocamos un concurso para que todo o mundo poida amosar o seu xeito de presumir de concello ao tempo que contribúe a dúas celebracións moi carballesas: o Día Mundial do Pan e o Ano do Xestal.

Toma nota das condicións para participar!

• Envíanos un deseño que inclúa ou faga alusión ao pan de Carballo ou a Carlos O Xestal. E se xuntas os dous, moito mellor!
• Hai dous xeitos de participar: enviando o teu deseño a @carballomola (tamén podes compartilo na túa conta) ou ao enderezo electrónico comunicacion@carballo.gal. Ti escolles.
• O prazo está aberto ata o 30 de setembro.

Haberá cinco premios para os cinco deseños que, ao xuízo do xurado, representen mellor o pan e/ou ao Xestal. O xurado estará formado pola pintora carballesa Rakele Cavallo, o deseñador gráfico carballés Óscar Vázquez, autor da imaxe do Ano do Xestal, e o profesor, músico e dinamizador social Xurxo Souto. O fallo farase público o 6 de outubro e a difusión das postais comezará o 16, Día Mundial do Pan. Cada premio estará dotado con 100 euros, e ademais o seu autor ou autora verá o seu traballo plasmado nunha postal que poderá viaxar por todo o planeta.