Inicio Carballo ao día Hemeroteca


Formulario de busca
O Concello e o CCA Carballo asinan un convenio de colaboración para dinamizar a actividade comercial da vila

SUBSCRIBIRON O ACORDO O PRESIDENTE DO CCA E O ALCALDE

O Concello e o CCA Carballo asinan un convenio de colaboración para dinamizar a actividade comercial da vila

Mércores 6 de xuño do 2012

O Alcalde de Carballo, Evencio Ferrero, e o presidente do Centro Comercial Aberto (CCA) Carballo, Xaime Viqueira, veñen de asinar un convenio de colaboración que ten por obxecto desenvolver medidas de potenciación e posterior execución de actividades para a consolidación dun centro comercial aberto na vila e, como consecuencia, para a dinamización da actividade comercial. Trátase dun acordo con vixencia até o 31 de decembro de 2012 que ten como finalidade establecer un marco de colaboración para a modernización do centro urbano de Carballo en aras de conseguir unha contorna de calidade, na que o urbanismo, o comercio e a hostalería teñen a máxima importancia. Algúns dos obxectivos do convenio son a optimización das prazas de estacionamento; a peonalización e semi peonalización de rúas do centro de Carballo; a dotación de mobiliario urbano e sinalización coherente co proxecto Centro Comercial Aberto; ou a promoción e innovación en xeral do comercio local. Entre as actuacións concretas previstas no acordo, hai que subliñar a organización de Xornadas de sensibilización, formación e reciclaxe, a elaboración do Catálogo do CCA, a realización de enquisas sobre a actividade comercial, o desenvolvemento de medidas que contribúan a mellorar o servizo ao cliente e a imaxe comercial, ou accións publicitarias e de promoción.

O Concello despexa as marxes do Anllóns, acondiciona o Bosque e emprende a limpeza das cunetas do municipio

RETÍRASE O EXCESO DE VEXETACIÓN E LIBÉRASE A CANLE DO RÍO

O Concello despexa as marxes do Anllóns, acondiciona o Bosque e emprende a limpeza das cunetas do municipio

Martes 5 de xuño do 2012

O Concello de Carballo a través da Concellaría de Obras e Servizos, que dirixe Luís Lamas, e da de Medio Ambiente, que dirixe Marcos Trigo, informa de que principiaron esta semana os traballos de limpeza das marxes do río Anllóns nos máis de sete quilómetros que suman as dúas beiras do Paseo que transcorre entre o Muíño do Quinto e o cemiterio de Bértoa. Os traballos, realizados pola Brigada de Obras e Medio Ambiente, céntranse en despexar a canle e en retirar a maleza na zona exterior en tres metros a cada marxe da corrente. Así mesmo, e de cara ás festas de San Xoán, procederase a limpar a contorna do Bosque do Añón. Deste xeito, a zona estará lista para as diferentes actividades que aí se celebran durante os días do patrón, dende o Descenso do Anllóns ata a Festa do Bosque. Por outra banda, a administración local prega aos veciños e veciñas que fagan bo uso do Paseo e que respecten a vexetación, absténdose de arrincar as pequenas plantas que se poden atopar na súa contorna. A Concellaría de Servizos tamén informa de que a Brigada principiou esta semana cos traballos para despexar as cunetas das estradas de acceso aos núcleos do municipio e para limpar as beirarrúas da capital municipal, uns labores que se repiten habitualmente a primeiros do mes de xuño e que se prolongan até o mes de setembro. Estas dúas actuacións están incluídas dentro do programa de mantemento de espazos públicos do Concello.

Os protagonistas da película Vilamor, proxectada no festival de Cannes, visitan Carballo para participar en numerosos actos

XOVES 7 E VENRES 8 DE XUÑO

Os protagonistas da película Vilamor, proxectada no festival de Cannes, visitan Carballo para participar en numerosos actos

Luns 4 de xuño do 2012

Os días 7 e 8 de xuño Carballo encherase de actividades arredor do cine en galego. Ignacio Vilar (director), Rubén Riós (actor), Sabela Arán (actriz) e Xoel Yáñez (actor) estarán na capital bergantiñá participando en diversos actos para facer ver que en Galicia se fai cine, en galego, de calidade e exitoso. É o caso de Vilamor, a película na que eles participan e que se proxectará nos Multicines Bergantiños a partir do venres 8 de xuño. Xa foi vista por miles de persoas en toda Galicia, converténdose nunha das máis exitosas nos cines galegos no que vai de ano, e vén de ser proxectada a pasada semana no festival de Cannes (Francia) e mais no de Cans (O Porriño). As diversas actividades, organizadas en colaboración co Servizo de Normalización Lingüística municipal para contribuír á difusión do galego no cine, desenvolveranse o xoves 7 e o venres 8 durante todo o día. Nese período, director e protagonistas participarán en charlas co alumnado do IES Parga Pondal, do IES Alfredo Brañas, do Colexio Artai e do CPI Xosé Pichel de Coristanco. Ademais, levarán a caravana Vilamor á feira de Carballo e serán recibidos polo alcalde carballés, Evencio Ferrero, o xoves 7 de xuño ás 12.00 horas, na Alcaldía do Concello.

A Xunta de Goberno aproba dous convenios de colaboración co CCA e Axober para potenciar a actividade económica

LUZ VERDE PARA O PROGRAMA DAS FESTAS DE SAN XOÁN 2012

A Xunta de Goberno aproba dous convenios de colaboración co CCA e Axober para potenciar a actividade económica

Luns 4 de xuño do 2012

A Xunta de Goberno Local reunida en sesión ordinaria vén de aprobar dous convenios de colaboración co Centro Comercial Aberto (CCA) Carballo e coa Asociación de Xóvenes Empresarios de Bergantiños (Axober) destinados á dinamización da actividade económica. No primeiro caso trátase dun acordo con vixencia até o 31 de decembro de 2012 para o desenvolvemento de medidas de potenciación e posterior execución de actividades para a consolidación dun centro comercial aberto na vila, co desenvolvemento de accións de modernización, innovación e dinamización do comercio local. Entre estas accións hai que subliñar a organización de Xornadas de sensibilización, formación e reciclaxe, a elaboración do Catálogo do CCA, a realización de enquisas sobre a actividade comercial ou accións publicitarias e de promoción. No caso de Axober, o convenio persegue o desenvolvemento de medidas de dinamización empresarial, fomento da emprendeduría e do asociacionismo e consolidación de empresas con actuacións como a celebración de eventos dinamizadores, de formación, información ou promoción. Entre as actividades coas que colabora o Concello a través do convenio están as Xornadas de Enerxías Renovables, ou a elaboración de guías, webs ou catálogos, entre outras. A vixencia estipulada tamén é a até o 31 de decembro de 2012.

A xustiza social que supón a normalización linguística analízase no marco do curso de verán da Universidade da Coruña

NO FÓRUM CARBALLO OS DÍAS 18, 19 E 20 DE XULLO

A xustiza social que supón a normalización linguística analízase no marco do curso de verán da Universidade da Coruña

Luns 4 de xuño do 2012

A Universidade da Coruña, en colaboración co Concello de Carballo, a Coordinadora de Traballadores/as de Normalización da Lingua (CTNL) e a Secretaría Xeral de Política Lingüística da Xunta de Galicia organizan a oitava edición (a quinta que se celebra en Carballo) do Curso de verán sobre Normalización Lingüística que ten lugar no Fórum Carballo os días 18, 19 e 20 de xullo e que se centra na xustiza social e a normalización da lingua galega. Así, o obxectivo xeral do curso é o e fortalecer a idea de normalización lingüística como causa de xustiza social, de xeito que se procurará amosar a oportunidade e necesidade de conectar e crear vínculos entre diferentes espazos e colectivos que procuran unha maior xustiza social, como os vencellados ao ecoloxismo, o feminismo, a cooperación, a defensa das persoas desfavorecidas, etc. O Reitor da Universidade da Coruña (UDC) Xosé Luís Armesto, e o Alcalde de Carballo, Evencio Ferrero, veñen de asinar o convenio de colaboración entre as dúas entidades para desenvolver este curso. No mesmo acto tamén se presentou o programa da acción formativa, na que poden participar un máximo de 70 persoas. O custo da matrícula é de 70 euros para público en xeral e 30 euros para persoas desempregadas, estudantes ou socias da CTNL, e a inscrición pode formalizarse a través do sitio web da Universidade da Coruña <www.udc.es>.

As rúas Coruña e Hórreo da capital carballesa acollen a exposición "130 anos de Voz" que amosa 60 planas históricas do xornal

PODERÁ VISITARSE ATÉ O 11 DE XUÑO

As rúas Coruña e Hórreo da capital carballesa acollen a exposición "130 anos de Voz" que amosa 60 planas históricas do xornal

Venres 1 de xuño do 2012

A capital municipal carballesa é o escenario até o luns 11 de xuño da mostra "130 anos de Voz" organizada polo xornal La Voz de Galicia con motivo dos seus 130 anos de historia e os 25 anos de La Voz de Carballo. Nela recóllense un total de 60 planas que representan momentos clave na historia da comarca, de Galicia, España e incluso a nivel mundial. Representantes de todos os concellos da Costa da Morte, deputados da bisbarra e a maioría da corporación carballesa incluíndo ao Alcalde, Evencio Ferrero e aos líderes do PP, Alberto Sueiro, de TEGA, Manuel Andrade, e do PSOE, José Antonio Viña -na foto de grupo-, realizaron un percorrido pola mostra, na que se reflicten sucesos de tanta relevancia como as coronacións de Alfonso XIII e Juan Carlos I, o falecemento de Franco, o asasinato de John Fitzgerald Kennedy ou o afundimento do Prestige, sendo unha das portadas máis comentadas durante a inauguración a que recolle o momento en que o buque era engulido polas augas. Porén, as planas que máis chamaron a atención son aquelas máis antigas, remontándose a historia do diario até o 4 de xaneiro de 1882. Ademais, na mostra estiveron representados os integrantes do equipo de La Voz de Carballo co delegado da corporación Voz, Xosé Ameixeiras, como anfitrión.

Máis de 240 xogadores disputan o VI Torneo Escola Lubiáns de Hóckey a Patíns no Pavillón Bergantiños

VENRES 8 E SÁBADO 9 DE XUÑO DE 2012

Máis de 240 xogadores disputan o VI Torneo Escola Lubiáns de Hóckey a Patíns no Pavillón Bergantiños

Venres 1 de xuño do 2012

Arredor de 240 xogadores de once clubs diferentes, ademais da propia Escola Lubiáns como anfitriona e a Selección Galega Sub-16 de hóckey como invitada, participan o venres 8 e sábado 9 de xuño no VI Torneo Escola Lubiáns de Hóckey a Patíns Concello de Carballo que se celebra no Pavillón Carballo Calero (zona Bergantiños) da capital municipal. A cita conta coa colaboración do Concello de Carballo e o patrocinio de numerosas firmas da comarca e a organización, representada polo presidente de Escola Lubiáns, Fernando Fidalgo, subliñou a axuda recibida por parte dos equipos de base, o que permite contar cunha ampla variedade de clubs. Así mesmo, Fidalgo anunciou que para o próximo ano a cita poderá contar cun equipo da Escola en categoría alevín por primeira vez en moito tempo, e tamén resaltou a importancia especial que se lle quere dar este ano ás Escolas de Patinaxe, coa presenza dunha exhibición das de Coristanco, A Laracha e o CEIP Fogar o sábado 9 ás 18.00 horas e como introducción á entrega de trofeos. O Alcalde de Carballo, Evencio Ferrero, quixo agradecer o traballo de Escola Lubiáns e "o esforzo que require soportar un club que está indo a máis dende abaixo". Os interesados e interesadas en acudir ao Torneo poden facelo o venres 8 a partires das 16.30 horas até as 22.00 e o sábado 9 de 10.00 a 20.00 horas. Para obter máis información, poden facelo na web de Escola Lubiáns: <www.escolalubians.com>.

O FIOT 2012 aposta de novo pola coprodución con Talía Teatro, o director Xulio Lago e a obra  "O método Grönholm"

ESTREA NO FESTIVAL O XOVES 11 E VENRES 12 DE OUTUBRO

O FIOT 2012 aposta de novo pola coprodución con Talía Teatro, o director Xulio Lago e a obra "O método Grönholm"

Venres 1 de xuño do 2012

A XXI edición do Festival Internacional Outono de Teatro (FIOT) de Carballo chega no mes de outubro como unha das citas culturais máis relevantes do ano en Bergantiños. Desta volta, o FIOT reserva unha sorpresa coa estrea da súa segunda coprodución teatral, neste caso cunha das compañías máis importantes do panorama escénico galego e coa que o festival ten unha relación moi especial dende o seu comezo: Talía Teatro. O Presidente da Asociación Cultural Telón e Aparte, Alberto Sueiro, explica que despois da primeira experiencia de coprodución do Festival con "Un cranio furado" de Producións Teatrais Excéntricas, a idea con Talía é "repetila, ampliala e mellorala" traballando "co mellor e maior representante do teatro da Costa da Morte". O texto é "O método Grönholm" de Jordi Galcerán, "un dos autores máis recoñecidos da escena teatral actual" e a dirección recae en Xulio Lago, un dos nomes de maior prestixio en Galicia, caracterizado pola sua coidada posta en escena. Ademais, Talía estrea a produción no FIOT para recibir o Premio do Público que gañou en 2010 por "Volpone" e que, ademais da distinción, inclúe unha invitación da organización para participar de novo no Festival. A estrea está prevista para o xoves 11 e venres 12 de outubro e Talía abre con esta produción, coa que queren agradecer a fidelidade do público, a celebración dos seus 25 anos, que cumpren en 2013.

O coñecido dúo uruguaio formado por Washington Carrasco e Cristina Fernández actúa o sábado 2 de xuño no Pazo da Cultura

NO AUDITORIO A PARTIRES DAS 21.30 HORAS

O coñecido dúo uruguaio formado por Washington Carrasco e Cristina Fernández actúa o sábado 2 de xuño no Pazo da Cultura

Xoves 31 de maio do 2012

O Pazo da Cultura acolle o sábado 2 de xuño a actuación do coñecido dúo uruguaio formado por Washington Carrasco e Cristina Fernández e por ese motivo foron recibidos na Casa do Concello polo Alcalde carballés, Evencio Ferrero. A idea de realizar este concerto xurdiu nun encontro de asociacións uruguaias na Embaixada en Madrid á que acudiron representantes da entidade carballesa Casa del Uruguay El Ceibo e na que estaba presente o Director Xeral de Vinculación. Así, acordouse que o Ministerio de Educación, Cultura e Deporte xunto co Ministerio de Relacións Exteriores de Uruguay financiasen o desprazamento dos artistas dende Uruguay, mentres que El Ceibo encargaríase dos gastos durante a estadía en Carballo. Carrasco e Fernández, artistas consagrados no seu país e cunha carreira de máis de 35 anos, ofrecerán durante o concerto e baixo o título "El poema y la canción" un repertorio de poesía musicalizada con textos de autores tan coñecidos como Pablo Neruda, poemas como o "Romance del enamorado y la muerte" ou temas como "La era está pariendo un corazón" dun artista como Silvio Rodríguez. Completan o repertorio con poemas e temas galegos como "Negra sombra" de Rosalía de Castro ou "En pé" de Ramón Cabanillas. A cita é a partires das 21.30 horas e a entrada é de balde ata completar o aforo.

O programa de Deporte na Escola contou con preto de 2.000 participantes e pecha coa 21 edición de Xogar na Rúa

SÁBADO 2 DE XUÑO NA PRAZA DO CONCELLO DE 17.00 A 19.30 HORAS

O programa de Deporte na Escola contou con preto de 2.000 participantes e pecha coa 21 edición de Xogar na Rúa

Mércores 30 de maio do 2012

O sábado 2 de xuño a Praza do Concello acolle a 21 edición de Xogar na Rúa, o peche oficial das actividades de deporte municipal en idade escolar 2011-2012 que se agrupan baixo o programa Deporte na Escola. Esa iniciativa pretende fomentar a práctica do deporte entre os nenos e nenas dos centros de ensino do municipio e teñen participado un total de 784 rapaces e rapazas, manténdose a cifra do ano anterior. Así mesmo, desenvolvéronse outras actividades como a celebración da fase local da carreira Campo a Través, a fase final de Natación Escolar, a fase final de Balonmán benxamín, alevín e infantil ou a Liga Escolar Multideporte, acumulándose a participación no curso que agora remata de 1.125 nenos e nenas. Un total de 1.909 cativos e cativas dos que moitos asistirán á Praza do Concello para participar en Xogar na Rúa e nalgunha das 16 actividades que ofrece, como mini basket, xadrez, pista americana, hockey, xogos autóctonos, búfalo mecánico, atletismo ou capoeira. Arredor de 50 monitores e coordinadores velarán porque Xogar na Rúa, que transcorrerá entre as 17.00 e as 19.30 horas, sexa un ano máis un exemplo de convivencia lúdica e participación. O Alcalde, Evencio Ferrero, asegura que lle ten unha lembranza especial de Xogar na Rúa porque o seu primeiro acto oficial como rexedor foi acudir a esta cita e desexou que o tempo acompañe e "que un ano máis sexa un éxito".

O pleno aproba un Plan Económico Financeiro para o Concello que estará vixente durante o período 2013-2015

LUZ VERDE PARA A CREACIÓN DE 64 NOVAS PRAZAS DE ZONA AZUL

O pleno aproba un Plan Económico Financeiro para o Concello que estará vixente durante o período 2013-2015

Martes 29 de maio do 2012

O pleno da corporación vén de aprobar, cos votos a favor de BNG e PSOE e a abstención de PP e TEGA a creación dun Plan Económico Financeiro para o Concello de Carballo que estará vixente durante o período 2013-2015. Trátase dunha medida que marca a Lei para corrixir o resultado da liquidación orzamentaria do ano 2011, que achega un remanente de tesourería negativo para gastos xerais de 1.801.326,58 euros, o que incumpre o obxectivo de estabilidade. Este importe xorde porque o Concello está pendente, entre outros, do ingreso de preto de dous millóns de euros de fondos FEDER (Fondo Europeo de Desenvolvemento Rexional) correspondentes aos traballos do Fórum Carballo, xa rematados e abonados pola administración local. Para corrixir a situación debe elaborarse un plan cunha vixencia de tres anos que servirá de marco referencial e que recolle como única condición que neses tres exercicios o Concello debe contar con 982.131 euros máis de ingresos que de gastos non financeiros no balance orzamentario e recolle a posibilidade de recorrer a un crédito para manter a estabilidade. O pleno tamén supuxo a aprobación por unanimidade da Ordenanza fiscal nº 13 reguladora das taxas pola retirada de vehículos para axustar as sancións ao prezo real do servizo. Até o de agora, o Concello financiaba boa parte do custo da grúa, mentres que con esta modificación os infractores financian o custo íntegro do servizo.

O alumnado da Escola de Arquitectura da Coruña propón solucións urbanísticas para catro espazos do municipio

ÁMBITOS: RÍO ANLLÓNS, A MILAGROSA, LUDOTECA E RAZO-BALDAIO

O alumnado da Escola de Arquitectura da Coruña propón solucións urbanísticas para catro espazos do municipio

Martes 29 de maio do 2012

O alumnado de terceiro curso da Escola Técnica Superior de Arquitectura da Coruña (ETSA) vén de presentar no marco do Fórum Carballo as súas propostas para a remodelación e mellora da contorna urbanística de catro espazos do municipio: tres na capital municipal e un cuarto nas proximidades do espazo natural de Razo-Baldaio. Varios profesores da ETSA falaron dos traballos en nome dos máis de 300 alumnos e alumnas que cursan Proxectos e Urbanismo e que levan traballando todo o curso na creación de solucións e reflexionando sobre as características da vila, as súas problemáticas e as súas potencialidades. Baixo o epígrafe "A maxia e a cidade", o profesorado suxeriu os proxectos de traballo: un arredor do aproveitamento do río Anllóns e a súa conexión co centro carballés; outro sobre a mellora do barrio da Milagrosa coa creación dun centro ecuménico na contorna da Igrexa; un terceiro sobre a ampliación da Ludoteca coa creación dunha Mediateca; e o cuarto sobre a creación dunha vivenda para un mago na contorna do espazo natural de Razo-Baldaio, en concreto nunha parcela situada na vía que une Santa Mariña co peirao de Razo. Segundo explica Felipe Peña, profesor da ETSA coordinador desta iniciativa, o obxectivo foi ofrecerlle ao alumnado "unha realidade estimulante e complexa sobre a que reflexionar" e fomentar, ao mesmo tempo, a posibilidade de que "xurdan ideas para levar a cabo proxectos municipais".

Compartir: