.jpg)
Aprobadas provisionalmente as subvencións PEL Reactiva para 269 persoas autónomas e microempresas do noso concello. Consulta aquí a relación
Martes 23 de marzo do 2021
O Boletín Oficial da Provincia (BOP) publica con data 23 de marzo a resolución da concesión provisional de subvencións PEL Reactiva para a reactivación económica e social da provincia da Coruña. Das 639 solicitudes recibidas polo Concello de Carballo pasan o primeiro filtro 466, pero, debido a que a cantidade máxima asignada pola Deputación Provincial da Coruña ao noso concello é de 550.578,18 euros, na relación provisional figuran 269 persoas autónomas e microempresas, que percibirán un total de 550.500 euros repartidos en axudas individuais de 1.500, 2.000, 2.500 ou 3.000 euros, en función dos criterios establecidos nas bases do programa.
En canto ás demais persoas solicitantes, 11 solicitantes presentaron renuncia e 174 non cumprían con algún dos requisitos estipulados.
A partir da publicación da resolución no BOP ábrese un prazo de 10 días hábiles, contados a partir de mañá, para presentar a desistencia da solicitude ou as alegacións que se consideren oportunas.
O fondo PEL Reactiva está destinado a persoas autónomas e microempresas que reúnan algún destes requisitos:
- Que se visen afectadas polo peche como consecuencia da declaración do estado de alarma de marzo
- Que visen reducida nun 75% a súa facturación no segundo trimestre fiscal en comparación coa media do semestre anterior.
- Que se visen na obriga de acollerse a un ERTE.