O SERGAS EMPEZOU A CONVOCAR Á VECIÑANZA DE XOVES A DOMINGO PARA UN CRIBADO

O noso concello baixa dos 300 casos activos de COVID-19 por primeira vez dende o 22 de xaneiro

A comisión de seguimento revisará o xoves as medidas incluídas no novo decreto da Xunta, que entra en vigor mañá

Martes 16 de febreiro do 2021

Por primeira vez dende o 22 de xaneiro, o noso concello baixa dos 300 casos activos de COVID-19. Hoxe o Sergas comunicou 284. Ao mesmo tempo, iniciou o chamamento individual para un cribado masivo que se levará a cabo dende o xoves ata o domingo no centro de saúde. Dende o Concello de Carballo ofrécese toda a colaboración precisa para o correcto desenvolvemento das probas, e está previsto establecer un dispositivo especial de vixilancia por parte da Policía Local para evitar aglomeracións na contorna do edificio. O alcalde, Evencio Ferrero, valora de forma moi positiva que por parte das autoridades sanitarias se decidise atender a solicitude de inclusión do noso concello no calendario de cribados, e solicita a todos os veciños e veciñas que acudan á convocatoria das autoridades sanitarias.

Para o xoves tamén está prevista unha nova xuntanza da comisión de seguimento da COVID-19, que balance da situación actual no noso concello e revisará as medidas incluídas no novo decreto da Xunta, que entrará en vigor ás 00.00 horas do día 17. A partir de mañá, en consecuencia, xa se irán restablecendo os servizos nos que se relaxan as restricións por parte das autoridades sanitarias. Así quedan as normas:

EQUIPAMENTOS CULTURAIS

Nas bibliotecas, arquivos, museos e salas de exposicións, monumentos e outros equipamentos culturais, tanto públicos coma privados, poderán realizarse actividades presenciais sen superar o 30% da capacidade máxima permitida e os grupos non poderán superar as 4 persoas.
En Carballo volverán a abrir mañá ao público a Oficina de Turismo e as bibliotecas municipais, aínda que ata o luns non recuperarán o seu horario habitual completo.
A celebración de actividades en cines, teatros, auditorios, congresos e similares poderá desenvolverse cun 30% de aforo, ata un máximo de 250 persoas en lugares pechados e de 500 ao aire libre. O público estará sentado, con máscara e distancia de seguridade, e deberá crearse un rexistro de asistentes que se conservará durante un mes.

EDUCACIÓN

A actividade lectiva presencial na Escola Oficial de Idiomas e no Conservatorio Profesional de Música restablecerase o 22 de febreiro, aínda que no CMUS permanecerán suspendidas as actividades presenciais que impliquen a utilización de instrumentos de vento e/ou exercicios de canto.
Para os/as universitarios/as, a data de referencia é o 1 de marzo, xa que a partir dese día restablecerase a modalidade presencial nas ensinanzas universitarias.

MAIORES

A actividade en centros sociais, sociocomunitarios, clubs de xubilados ou similares continúa suspendida, o que afecta á rede municipal de centros sociais.
Permanecerán abertos os centros de día de maiores e de persoas con discapacidade, así coma os centros ocupacionais.

COMERCIO

Os establecementos comerciais que non formen parte de parques comerciais poderán permanecer abertos ata as 21.30 horas como máximo, cun aforo do 50% e atención preferente a maiores de 65 anos.
Mercado Municipal recupera o seu horario habitual a partir de mañá: de luns a venres, de 08:30 a 14:00 e de 17:00 a 20:00 horas, e os sábados e domingos de feira, de 08:30 a 14:00 horas.
As grandes superficies (máis de 2.500 metros cadrados) deberán dispoñer dun sistema ou dispositivo que permita ao público coñecer en todo momento o número de persoas que hai no interior e a capacidade máxima permitida.
Os centros e parques comerciais, ademais, permanecerán pechados as fines de semana, agás os establecementos que comercialicen produtos de primeira necesidade (alimentación, combustible, hixiene, animais, etc.)

HOSTALARÍA

Os establecementos de hostalaría e restauración (bares, cafetarías, restaurantes) permanecerán pechados ao público e poderán prestar exclusivamente servizos de entrega a domicilio ou para a súa recollida no local e consumo a domicilio.
O servizo de entrega a domicilio poderá realizarse ata as 24.00 horas.

DEPORTE

A práctica da actividade física e deportiva non federada so poderá realizarse ao aire libre ou en instalacións deportivas ao aire libre, de forma individual ou con persoas conviventes e coa utilización de máscara.
A práctica da actividade deportiva federada de ámbito autonómico, adestramentos e competicións, axustarase aos correspondentes protocolos Fisicovid-Dxtgalego aprobados, e os deportistas participantes e demais persoal autorizado non estarán suxeitos ás limitacións de entrada e saída existentes en determinados ámbitos territoriais e ás limitacións establecidas á liberdade de circulación das persoas en horario nocturno nos casos en que exista causa xustificada.
As competicións deportivas federadas de nivel nacional e os seus adestramentos desenvolveranse de acordo co establecido pola Administración competente e de conformidade coas limitacións establecidas nos protocolos federativos correspondentes.
Poderán permanecer abertas as instalacións deportivas ao aire libre para a práctica deportiva individual.
Poderán permanecer abertas as instalacións deportivas nas que se celebren adestramentos ou competicións de ámbito federado, profesional ou non profesional, cuxos vestiarios e zonas de ducha poderán ser usados cunha ocupación de ata o 30 % da capacidade máxima permitida, e procederase á limpeza e desinfección despois de cada uso e ao final da xornada. En todo caso, queda prohibida a asistencia de público ás competicións e adestramentos.

TRANSPORTE

Os transportistas poderán utilizar o servizo de cátering naqueles establecementos situados en centros loxísticos e nas áreas de servizo da rede de estradas do Estado en Galicia, vías de alta capacidade e rede primaria básica de estradas de Galicia que dispoñan de cociña. Para o acceso a estes establecementos será obrigatorio a presentación da tarxeta de profesional do transporte CAP.
Os taxis e vehículos VTC poderán prestar servizos de transporte para persoas conviventes, así como para escolares, persoal sanitario, pacientes ou traballadores non conviventes, ocupando todas as prazas dispoñibles.

NORMAS QUE SE MANTEÑEN

Interaccións sociais limitadas a conviventes (agás no traballo e no coidado de persoas maiores ou menores)
Mobilidade reducida ao propio concello (agás casos permitidos)
Toque de queda de 22.00 a 06.00 horas.