Esta semana comezaremos o reparto porta a porta de 32.000 máscaras cirúrxicas adquiridas polo Concello de Carballo

Persoal municipal tamén entregará a domicilio 288 tarxetas de alimentos para as familias de 395 escolares co comedor subvencionado ao 100%

Luns 13 de abril do 2020

Persoal municipal realizará o reparto das 32.000 mascarillas

O Concello de Carballo iniciará esta semana o reparto de 32.000 máscaras cirúrxicas homologadas en todos os fogares para asegurar que toda a veciñanza teña unha á súa disposición no caso de verse obrigada a acudir a un lugar no que non sexa posible respectar as distancias de seguridade sanitarias con outras persoas. O uso de mascarillas está recomendado neses casos polo Ministerio de Sanidade.

Da distribución, que se fará porta a porta, encargarase persoal de Protección Civil e a Brigada de Obras, principalmente, co apoio de voluntariado doutros departamentos municipais. En cada vivenda de cada parroquia entregarase unha bolsa de plástico con dúas máscaras.

As 32.000 máscaras, que vén de adquirir o Concello de Carballo tras numerosas xestións, súmanse ás 4.000 enviadas polo Goberno do Estado para os/as traballadores/as e que foron repartidas hoxe por fectivos da Garda Civil e da Policía Local no polígono industrial, grandes empresas situadas noutros puntos e supermercados, principalmente.

Hoxe tamén chegou novo material da Xunta de Galicia: 8 buzos de prolipropileno, 400 pares de luvas, 5 botellas de xel hidroalcohólico, 4 de lixivia e 400 máscaras cirúrxicas.

Tarxetas de alimentos

Protección Civil tamén entregará a domicilio un total de 288 tarxetas do Concello de Carballo para compra de alimentos ás familias que teñen o servizo de comedor escolar subvencionado ao 100% para os seus fillos e fillas. As solicitudes recibidas polo departamento de Igualdade e Benestar corresponden a un total de 395 nenos e nenas.