Iniciados por fin os traballos de reapertura da canle da lagoa de Baldaio

O alcalde e varios membros do goberno municipal achegáronse ata a zona para interesarse polo desenvolvemento das obras

Venres 28 de febreiro do 2020

Os traballos iniciáronse sobre as 10.00 horas

O alcalde, Evencio Ferrero, e varios membros do goberno municipal achegáronse esta mañá ata Baldaio coincidindo co inicio dos traballos de reapertura da canle da lagoa por parte da Xunta de Galicia. Os representantes do Concello de Carballo tiveron a ocasión de intercambiar opinións co colectivo de mariscadores, no que existe unha fonda preocupación polas repercusións que a acumulación de auga doce pode ter na produción, que estaba nun dos seus mellores momentos en canto a cantidade, calidade e rendibilidade.

Segundo informou a Xunta, que estivo representada hoxe en Baldaio por responsables técnicos e políticos das Consellerías do Mar e Medio Ambiente, entre eles as respectivas conselleiras, “a semana pasada, técnicos dos dous departamentos autonómicos e do Instituto Universitario de Biodiversidade Agraria e Desenvolvemento Rural (Ibader) da Universidade de Santiago desprazáronse a Baldaio para analizar in situ o estado da lagoa e informar sobre as medidas máis axeitadas para paliar a situación. A raíz destas visitas, acordouse como primeira acción de carácter urxente proceder á apertura da lagoa co fin de que poida desaugar e ante a imposibilidade de que este proceso se produza nestes momentos de forma natural”.

O alcalde achegouse a Baldaio para ver as obras

Para levar a cabo os traballos cóntase cunha máquina retro-escavadora, que traballará na reapertura da canle ata que suba a marea. Como vimos facendo dende o primeiro día,  dende o Concello de Carballo seguimos en contacto coa agrupación de mariscadores e coa poboación afectada pola crise ambiental, económica e social provocada pola acumulación de toneladas de area na canle que comunicaba a lagoa co mar. E unha vez máis poñémonos a disposición das Administracións competentes para colaborar na adopción das medidas que garantan a conservación dos valores naturais de Baldaio e das actividades residencial e económica que, dun xeito sostible, tamén se veñen desenvolvendo na zona.