Inicio Carballo ao día Novas O Horto Infantil Ecolóxico Municipal...

O Horto Infantil Ecolóxico Municipal retoma a súa actividade tras o parón invernal con 62 nenos e nenas

Hoxe celebrouse un novo encontro interxeracional entre usuarios/as do Centro de Día pertencente á rede galega e alumnado do CEIP Xesús San Luís Romero

Venres 22 de febreiro do 2019

Alumnado do CEIP San Luís Romero que participou no encontro interxeracional

Alumnado do CEIP San Luís Romero que participou no encontro interxeracional

Despois do parón invernal, a actividade regresará a vindeira semana ao Horto Infantil Ecolóxico Municipal de Carballo con 62 nenos e nenas, xa que o mércores empeza o obradoiro para o alumnado de 4º curso de Educación Infantil. Para os nenos de tres anos será a súa primeira toma de contacto coas instalacións da rúa Nardos, non así para os seus compañeiros/as máis maiores, que xa se reincorporan o luns. Uns e outros teñen por diante tres meses claves para preparar a colleita que levarán á Pequefeira o 31 de maio.

Ao mesmo tempo, continúa a súa andadura o Horto Viaxeiro, no que participan este curso 2.000 alumnos e alumnas dos colexios Artai, CRA Ponte da Pedra, Fogar, Gándara-Sofán, Nétoma-Razo, Escola Infantil As Landras, CEIP Bergantiños e CEIP Xesús San Luís Romero. Este último foi, precisamente, o convidado de hoxe a un novo encontro interxeracional cos usuarios e usuarias do Centro de Día pertencente á Rede de Centros da Xunta de Galicia.

Usuarios/as do centro leron unhas coplas

Usuarios/as do centro leron unhas coplas

Hoxe, no edificio da Praza de Vigo, que ten nestes momentos 26 usuarios/as, houbo unha festa moi especial, na que os/as maiores e o persoal do centro recibiron aos nenos e nenas cunha regueifa e estes correspondéronlles cun recitado de versos. Despois de intercambiar experiencias e coñecementos, pequenos e maiores despedíronse cunha merenda e un intercambio de agasallos, aínda que o mellor de todos foi poder compartir un anaco desta mañá de venres.

Compartir: