Concello de Carballo

FEIRÓN DE INVERNO 2010

Carballo pon en marcha a I Ruta do Pincho de Inverno entre o 30 de xaneiro e o 28 de febreiro

23/01/2010 Despois da exitosa experiencia da I Ruta do Pincho de Verán, o Concello de Carballo, a través da Concellaría de Promoción Económica, e en colaboración cos locais hostaleiros do casco urbano, pon en marcha a I Ruta do Pincho de Inverno, que ten lugar entre o 30 de xaneiro e o 28 de febreiro. Un total de once establecementos de restauración participan na iniciativa, que comeza coincidindo coa celebración do Feirón de Inverno 2010 o último domingo de xaneiro. O horario da iniciativa é os sábados e domingos de 13.00 a 15.00 e de 20.00 a 22.00 horas, cunha pequena variación respecto do Pincho de Verán (en que era de 12.00 a 14.00 horas). Tamén está previsto mellorar os premios para os veciños e veciñas que participen, xa que poderán gañar unha estadía no Balneario de Carballo, ou ben unha cea por valor de 100 euros nun dos locais hostaleiros que colaboran na ruta.

Outra das diferencias respecto do Pincho de Verán é o incremento na calidade dos pinchos. Así, os establecementos xa teñen entregado unha listaxe dos pinchos que van ofrecer cada día para subir a esixencia na súa presentación e elaboración. Algunhas das apostas son: crêpes de bechamel e marisco; bolos preñados; filloas recheas; ou crema de queixo do Cebreiro con crema de membrillo e noz caramelizada. Tamén se subliña o protagonismo de produtos locais, coa presenza en moitos dos pinchos do pan de Carballo. Os establecementos que toman parte na iniciativa son: Cafetería Habanos 79, Mesón A Cabaña, O Xabarín, Cafetería Baños Viejos, Os Mareantes, Restaurante-Vinoteca Rincón de Elías, Restaurante Bergantiños, O Rincón - Viños e Xantares, Cervecería Dublín Carballo, Café-Vinoteca Ánfora, Cafetería El Juzgado.

No que respecta aos sorteos, existen dúas modalidades. Hai un primeiro premio: unha estadía dunha fin de semana para dúas persoas no Balneario de Carballo a media pensión e con acceso a un tratamento termal. E un segundo premio: unha cea por valor de 100 euros para dúas persoas no Rincón de Elías, local que resultou elixido a través dun sorteo entre os participantes. Para acceder ao primeiro premio será necesario ter completado a Ruta do Pincho de Inverno por completo, parando nos once establecementos, que se encargarán de distribuír e selar un cartón que permite acceder ao sorteo, e que se poderá depositar en calquera furna dos bares e cafeterías da ruta. Para acceder ao segundo premio só e necesario ter participado na Ruta do Pincho de Inverno en calquera dos establecementos.

Ángel Latasa, do Café-Vinoteca Ánfora, desexou, en nome de todos e todas os hostaleiros que a participación sexa alomenos tan elevada coma no verán, e manifestou o desexo dos participantes de que se poida potenciar a gastronomía carballesa con esta actividade. Á súa vez, o Alcalde de Carballo, Evencio Ferrero, que presentou a iniciativa xunto co Concelleiro de Promoción Económica, Xosé Manuel García Guillín, felicitou a todos os participantes na ruta e subliñou que "ese é o camiño que pode contribuír a fidelizar aos clientes e aos visitantes a Carballo" e desexou que a partires do último domingo de xaneiro, e durante un mes, "as familias desfruten aínda máis de Carballo e da gastronomía local".

Volver