O Conservatorio Profesional de Música de Carballo programa actividades para manter a actividade lectiva de xeito telemático

Seguindo as directrices da Consellería de Educación, as tarefas non presenciais non serán avaliables de cara ás cualificacións finais

Mércores 25 de marzo do 2020

O equipo directivo do Conservatorio Profesional de Música de Carballo, a raíz da prolongación do estado de alarma, decidiu programar unha serie de actividades para intentar manter a actividade lectiva polo menos de xeito telemático. Así, naquelas materias nas que sexa posible, o profesorado estará en contacto cos alumnos e alumnas a través do correo electrónico ou do Whatsapp para enviarlles unidades didácticas e/ou tarefas que lles permitan continuar coa súa formación.

Dende a directiva explican que, segundo as directrices da Consellería de Educación, as tarefas que se realicen de maneira non presencial non serán avaliables de cara ás cualificacións finais e todos os novos contidos que se impartan telematicamente terán que ser impartidos de novo cando se retomen as clases con normalidade. Ademais, os obxectivos curriculares serán revisados para adaptalos a esta situación excepcional na que nos atopamos.

O claustro de profesores/as do CMUS envía os seus ánimos a todo o alumnado e ás súas familias, xunto co desexo de poder recuperar a actividade normal o antes posible.