Concello de Carballo

LUZ VERDE AO INCREMENTO DAS TAXAS DO CONSERVATORIO

O pleno aproba por unanimidade tres mocións sobre as plantas xudiciais, a mellora da travesía de Bértoa e os abonos deportivos

03/07/2012 A sesión plenaria extraordinaria celebrada o luns 2 de xullo supuxo a aprobación por unanimidade dos membros da corporación de tres mocións, unha presentada na pasada sesión polo PSOE e agora asumida de forma conxunta por todos os grupos políticos con representación, e outras dúas do PP. Entre estas últimas encóntrase unha proposta que solicita a mellora da travesía de Bértoa, con especial atención á seguridade vial e ao pintado dos pasos de peóns na AC-552 Carballo-A Coruña. A moción tamén suxire a elaboración por parte do Concello dun proxecto técnico de mellora da seguridade viaria e de dotación de servizos, beirarrúas e iluminación. O Concello ten elaborado dende o ano 2004 un proxecto para a mellora da travesía de Bértoa que ascende a 1,3 millóns de euros e o goberno local espera que o organismo titular da vía, a Consellería de Medio Ambiente, Territorio e Infraestruturas, asuma o seu arranxo e mellora. Co apoio de todos os concelleiros saíu tamén adiante a proposta conxunta para solicitar que non se modifiquen as plantas e as taxas xudiciais e evitar un prexuízo para veciños e veciñas. O texto insta ao Goberno de España para que non dea validez algunha á proposta de reforma da planta elaborada polo Consello Xeral do Poder Xudicial, mantendo as demarcacións que existen na actualidade.

Así coa nova planta xudicial a demarcación carballesa pasaría a formar parte da planta da Coruña xunto coa de Betanzos, co conseguinte prexuízo para profesionais e veciñanza do municipio. Tamén insta ao Goberno para que retire o Anteproxecto de Reforma das taxas xudiciais, e para que reforme a Lei 37/2011, de 10 de outubro, de Medidas de Axilización procesal, no sentido de volver ao sistema anterior no que se refire á contía dos recursos de apelación e casación e en materia de costas no proceso contencioso-administrativo, para favorecer que a cidadanía teña acceso á defensa universal. Por último, saíu adiante por unanimidade, despois da inclusión dunha enmenda, unha moción do PP para instar ao Padroado Deportivo Municipal a que avalíe as circunstancias nas que se podería modificar a idade na que se poden manter os fillos/as dos abonados/as como beneficiarios do abono familiar, mentres non teñan ingresos por atoparse en situación de desemprego ou por continuar os seus estudos.

Taxas do Conservatorio e Comisión de Investigación

O pleno tamén supuxo a modificación da Ordenanza fiscal nº 18: Taxas do Conservatorio Profesional de Música co apoio do PSOE e o BNG. O cambio supón un incremento nos abonos de matrícula co obxectivo de reducir o déficit do organismo nestes momentos, que ascende a 200.000 euros derivados dos gastos de mantemento. O Concello incluirá Conservatorio a partir de agora nas bolsas de estudo que concede a administración local, ás que tan só poderán optar aqueles alumnos e alumnas do municipio, dado que o centro conta con estudantes carballeses, pero tamén cunha importante porcentaxe de alumnado doutros concellos, especialmente en Grao Profesional. As taxas serían, para grao elemental: 285 euros para o curso completo; 50 euros para as probas de acceso; e 70 euros para materias pendentes. Para Grao Profesional serían: 335 euros para o curso completo en 1º e 2º curso, 385 euros en 3º e 4º e 440 euros para 5º e 6º curso; 80 euros para as probas de acceso; e unha taxa de 100 euros para materias pendentes.

No apartado de seguimento de órganos de goberno, a orde do día supuxo a dación de conta das conclusións da Comisión Especial de Investigación pola presunta contratación irregular dunha persoa polo Concello de Carballo relativa ao servizo de axuda a domicilio. O ditame foi referendado por PSOE, PP e TEGA e rexeitado polo BNG. Dentro da orde do día tamén saíu adiante un recoñecemento dunha compatibilidade por parte dun operario municipal para desempeñar un segundo posto de traballo no sector privado.

Volver