Concello de Carballo

Logotipo Concello de Carballo

Avisos

TRÁMITES: NO PAZO DA CULTURA DE 10.30 A 13.30 HORAS

Prazos de matrícula e datas dos exames do Conservatorio Profesional de Música de Carballo para a convocatoria de setembro

O Concello de Carballo a través da Concellaría de Educación que dirixe Mar Eirís informa de que o alumnado interesado en facer unha proba de acceso para calquera dos cursos de Grao elemental ou Profesional do Conservatorio Profesional de Música, agás para o 1º curso de Elemental e Profesional, deberá formalizar a súa matrícula entre o 1 e o 4 de setembro. A data para estas probas é do día 10 de setembro. O alumnado que non superou o curso 2014/2015 en xuño, examinarase das materias pendentes o día 9 de setembro. Posteriormente, estes alumnos e alumnas e todos os que por algunha razón non formalizaron a matrícula no mes de xullo, poden facelo entre o 14 e o 18 de setembro. Para a realización destes trámites deberán dirixirse ao 1º andar do Pazo da Cultura en horario de 10.30 a 13.30 horas (Oficinas de Cultura-Conservatorio).

ANOTACIÓNS ATÉ O 12 DE AGOSTO ÁS 20.00 HORAS

Aberto o prazo até o 12 de agosto para anotarse no "VII Circuíto BTT 12 horas" que terá lugar o 22 de agosto no circuíto do Polígono de Bértoa

A Asociación Deportiva Media Ducia, organiza, coa colaboración do Concello de Carballo, o "VII Circuíto BTT 12 horas". Esta proba é unha marcha ciclo turista de velocidade libre e non competitiva de carácter lúdico que vai dirixida a todo aquel ou aquela deportista Sub 23, Elite, Máster, ciclo turista, etc. federado ou non federado, debendo tramitar estes últimos a licenza dun día, que a asociación se encargará de facer a través da Federación Galega de Ciclismo. A proba está prevista para as 10.00 horas do 22 de agosto con finalización ás 22:00 horas do mesmo día. O prazo de inscrición está aberto até o 12 de agosto de 2015 ás 20.00 horas e a distancia do circuíto é de 10 quilómetros. Os interesados e interesadas en formalizar a súa inscrición poden facelo a través da página web de <www.magmasports.es>, clicando aquí. Tamén é posible descargar o regulamento da proba en pdf neste mesmo aviso.

O CONCELLO REALIZA CONTROIS PROPIOS SOBRE A SITUACIÓN DOS AREAIS

Resultados das análises realizadas durante o último mes nas praias de Razo, Arnados, Pedra do Sal, Baldaio-As Saíñas e Ría de Baldaio que amosan a calidade das augas

O Concello de Carballo fai públicas unhas análises realizadas en varias xornadas durante o último mes nas praias de Razo, Arnados, Pedra do Sal, Baldaio-As Saíñas e tamén na Ría de Baldaio que demostran a boa calidade das augas destes areais. Así, ademais das análises que, de forma periódica, realiza a Consellería de Sanidade, o Concello tamén realiza un seguimento do estado das augas dos areais do municipio e realiza unha observación continuada do seu estado. Os interesados e interesadas poden descargar os resultados das análises a través dun documento en pdf neste mesmo aviso. Tamén poden clicar nunha ligazón ao Mapa de zonas de Baño de Galicia, na páxina web do Sergas, na que poden consultarse as datas e os resultados das últimas análises realizadas nos areais carballeses por parte da Xunta, con cualificacións das augas que van de "boa" a "excelente".

OS TRÁMITES PODEN REALIZARSE NO REXISTRO XERAL DA CASA DO CONCELLO

O Rexistro Xeral situado no Pazo da Cultura estará pechado entre o luns 3 e o venres 21 de agosto

O Concello de Carballo, a través do departamento de Cultura, informa de que o Rexistro Xeral de Cultura, situado no primeiro andar do Pazo da Cultura de Carballo, permanecerá pechado entre o luns 3 e o venres 21 de agosto con motivo das vacacións de verán. En todo caso, calquera trámite pode levarse a cabo no Rexistro Xeral situado no primeiro andar da Casa do Concello durante ese período. Pedimos desculpas polas posibles molestias ocasionadas.

RETOMA A ACTIVIDADE O XOVES 3 DE SETEMBRO

A oficina de información que mantén aberta a Unión de Consumidores de Galicia (UCGAL) no segundo andar da Casa do Concello estará pechada durante o verán

O Concello informa de que a oficina de información que mantén aberta a Unión de Consumidores de Galicia (UCGAL) no segundo andar da casa consistorial estará pechada durante o verán -nos meses de xullo e agosto- e retomará a súa actividade habitual o xoves 3 de setembro. Hai que lembrar que a UCGAL, en colaboración co Concello de Carballo, ten en marcha un proxecto dirixido a coñecer a demanda real de servizos de información e asesoramento en materia de consumo dos veciños e veciñas do municipio para averiguar se é necesaria a apertura dunha oficina na vila no futuro. Por iso, cunha finalidade eninentemente estatística, a Unión de Consumidores de Galicia atende as demandas das persoas interesadas os luns e os xoves en horario de 10.00 a 13.30 horas no segundo andar da Casa do Concello. Está previsto que o proxecto se desenvolva até finais do mes de setembro.

OS LUNS PERMANECE PECHADO

O Concello informa do horario de verán da Oficina de Información Turística - Museo de Bergantiños

O Concello de Carballo, a través da Concellaría de Promoción Económica e Turismo que dirixe Xosé Regueira, informa de que a partir do mércores 1 de xullo e durante os meses de verán (xullo e agosto) o Museo de Bergantiños e Oficina de Información Turística de Carballo terá o seguinte horario:
  • Polas mañás: de martes a venres, de 10.00 a 14.00 horas; sábados e domingos de feira, de 11.00 a 14.00 horas.
  • Polas tardes; de martes a venres, de 19.00 a 21.00 horas
  • LUNS PECHADOS

O CONCELLO PODE SANCIONAR A QUEN INCUMPRAN A NORMATIVA

Bando do Alcalde no que se lembra que os propietarios e propietarias de soares deben manter os seus predios limpos e libres de residuos

Á vista do importante número de soares deste Concello que se atopan con presenza de herbas, maleza, residuos sólidos e roedores e que, por tanto, non reúnen os requisitos de seguridade, salubridade e ornato público que deben garantir os seus propietarios e propietarias. En cumprimento da Ordenanza municipal reguladora da limpeza, salubridade e hixiene no termo municipal de Carballo, faise público o recordatorio dos seguintes preceptos de xeral cumprimento para a cidadanía:
  • Primeiro.- Os/as propietarios/as deberán manter os seus predios limpos e libres de residuos, así como libres de animais perigosos ou de potenciais focos infecciosos, e deberanse realizar os labores preventivos que sexan precisos para tal efecto.
  • Segundo.- Os/as propietarios/as deberán evitar o crecemento incontrolado de maleza e outros vexetais que afecten ás parcelas lindeiras. Tampouco poderán invadir as vías públicas, sexa na superficie ou no seu voo, salvo autorización expresa municipal, que se concederá tan só por motivos de interese natural ou estético e de conservación do patrimonio natural.
  • Terceiro.- É potestade do Concello a inspección e realización subsidiaria dos traballos de limpeza aos que se refiren os parágrafos anteriores. No caso de execución subsidiaria dos traballos polos servizos municipais, esta farase con cargo ao/á obrigado/a, sen prexuízo das sancións que correspondan.

A BIBLIOTECA REGO DA BALSA ABRIRÁ SÓ POLAS MAÑÁS EN AGOSTO

A Ludoteca Municipal abrirá polas mañás durante os meses de xullo e agosto en horario de 10.30 a 13.30 horas

Ludoteca
O Concello de Carballo informa do horario de verán da Ludoteca Municipal, que comezou xa o mércores 1 de xullo, e que é de luns a venres de 10.30 a 13.30 horas. Polo tanto, adáptase e amplíase durante os meses de vacacións para ofrecer un mellor e máis amplo servizo, para que as nenas e os nenos, acompañados das súas familias, poidan usar este espazo de xogo e convivencia infantil situado en pleno centro, fronte ao Xardín municipal. Manterá este horario durante todo o mes de xullo e tamén durante o mes de agosto. Con respecto á Biblioteca Rego da Balsa, en xullo manterá os seus horarios habituais (de 10.30 a 13.30e de 16.30a 20.30 horas), e só os modificará no mes de agosto, cando abrirá só de mañá (de 10.30 a 13.30 horas). Por último, hai que informar que a Biblioteca Municipal da rúa de San Xoán permanecerá aberta de luns a venres de 8.30 a 14.30 horas durante os meses de xullo e agosto.

OS INTERESADOS/AS PODERÁN CHAMAR AO 900 907 363

Gestagua pon a disposición dos usuarios e usuarias as súas oficinas e un teléfono de atención 24 horas a partir do mércores 1 de xullo

O Concello de Carballo informa aos veciños e veciñas de que a partir do mércores 1 de xullo a empresa Gestagua, nova concesionaria da xestión do servizo de subministro de augas do Concello, pon a disposición dos usuarios e usuarias as súas oficinas na vila, situadas na rúa río Ulla, nº 2 (na contorna da Oficina de Correos), nas que ofrecerá información puntual e atenderá calquera incidencia que se produza. Ao mesmo tempo pon a disposición dos veciños e veciñas un teléfono de atención 24 horas: 900 907 363.

RECIBÍRONSE 53 SOLICITUDES PARA 15 PRAZAS

Resultado do sorteo público para a adxudicación das 15 prazas do Concello de Carballo nos Campamentos Deportivos 2015 da Deputación da Coruña

Cartel
O Concello de Carballo dá a coñecer o resultado do sorteo público de prazas para acceder aos Campamentos Deportivos de Verán da Deputación da Coruña 2015. Así, rematado o prazo de inscrición para participar nos campamentos, o Concello de Carballo recibíu un total de 53 solicitudes. Ao superar o número de solicitudes o de prazas ofertadas (15), e dada a necesidade de remitir á Deputación da Coruña a listaxe de participantes nesta actividade, o día 2 de xuño de 2015 ás 10.00 horas celebrouse na Casa do Concello un Sorteo Público para determinar os adxudicatarios das mesmas. Os interesados e interesadas poden consultar neste mesmo aviso a relación de 15 nenos e nenas que poden apuntarse nos campamentos, así como a listaxe de agarda. Hai que lembrar que as quendas que lle corresponden ao Concello son a terceira e a cuarta, é dicir, dos días 12 ao 18 de xullo; e dos días 19 ao 25 de xullo de 2015. A cota de inscrición para os nenos e nenas admitidos é de 85 euros. Os interesados e interesadas poden descargar neste mesmo aviso un tríptico informativo sobre a actividade. Tamén é posible consultar a información dispoñible na páxina web da Deputación.

ENTRE O LUNS 29 DE XUÑO E O DOMINGO 6 DE SETEMBRO

O Concello de Carballo, a través de Carballo Deporte, fai públicos os horarios das instalacións deportivas municipais durante o verán

O Concello de Carballo fai públicos os horarios das instalacións deportivas municipais durante os meses do verán (entre o luns 29 de xuño e o domingo 6 de setembro). Son os seguintes:

PISCINA VILA DE NOIA

Pechada do 3 ao 23 de agosto. Horarios:
  • De luns a venres pola mañá: de 8.00 a 14.00 horas
  • De luns a venres pola tarde: de 17.00 a 22.30 horas
  • Sábado pola mañá: de 10.00 a 14.00 horas

PISCINA CARBALLO CALERO

Pechada do 24 de agosto ao 6 de setembro. Horarios:
  • De luns a venres pola mañá: de 7.15 a 13.30 horas
  • De luns a venres pola tarde: de 17.00 a 22.30 horas
  • Sábado pola mañá: de 9.00 a 13.30 horas

OS TRABALLOS DESENVOLVÉRONSE ESTA SEMANA

A Brigada de Medio Ambiente do Concello de Carballo limpa de maleza e malas herbas a Ponte Lubiáns

Ponte Lubiáns
O Concello de Carballo informa, a través da Concellaría de Obras e Servizos que dirixe Luís Lamas, de que os operarios da Brigada de Medio Ambiente Municipal veñen de limpar esta semana o firme e a contorna da Ponte Lubiáns, situada entre os municipios de Carballo e Coristanco. Retirouse a maleza e as malas herbas, tanto na superficie como na contorna da ponte durante toda unha xornada desta semana. Hai que lembrar que a Ponte Lubiáns, Tamén coñecida como Ponte Vella, é de orixe romana (un altar dedicado ao deus Cosus, protector das colleitas do agro, lembra a súa orixe), mais foi reformada na Idade Media. Está construída sobre o río Rosende, afluente do río Anllóns. É un resto conservado da antiga vía romana per loca marítima que, vindo de Grandimirun, hoxe Brandomil, no Concello de Zas, atravesaba a parroquia de San Martiño de Oca para continuar polo Concello de Carballo ata Brigantium, hoxe cidade da Coruña. Na imaxe o antes (arriba) e o despois (abaixo) trala limpeza.

O PXOM ESTÁ PENDENTE DA APROBACIÓN DEFINITIVA DA XUNTA

O Concello pon a disposición da veciñanza o documento para a aprobación provisional do Plan Xeral de Ordenación Municipal (PXOM) no web municipal

Os veciños e veciñas e todos os interesados e interesadas xa poden consultar no web municipal a documentación do Plan Xeral de Ordenación Municipal (PXOM). O pleno da corporación apoiou por unanimidade a aprobación provisional do PXOM do Concello de Carballo nunha sesión extraordinaria celebrada o luns 2 de febreiro de 2015. Porén, este plan non será executivo ata a aprobación definitiva por parte da Xunta de Galicia. En todo caso, o Concello pon a disposición dos interesados e interesadas o documento para a aprobación provisional, que pode consultarse nunha ligazón dispoñible máis abaixo neste mesmo aviso.

*Para poder acceder aos arquivos, recoméndase que se descarguen os documentos en pdf antes de abrilos, debido a seu elevado peso.

Buscador:



© Concello de Carballo, 2009