Concello de Carballo

Logotipo Concello de Carballo

Avisos

MÁIS INFORMACIÓN EN SERVIZOS SOCIAIS NO 981 700 688

O Concello informa de que está aberto durante todo o ano o prazo para inscribir aos nenos e nenas no programa Concilia para o servizo de días soltos

Concilia
A Concellaría de Igualdade e Benestar que dirixe Maica Ures informa de que permanece aberto durante todo o ano o prazo de inscrición para os nenos e nenas no programa Concilia, que ten como obxectivo axudar ás familias na súa conciliación coa vida laboral. No mes de agosto pechouse o prazo para os usuarios fixos do programa, que precisan do servizo de canguraxe a diario. Porén, aqueles usuarios e usuarias que queiran empregar o servizo en días soltos, poden dirixirse en calquera momento do ano a Servizos Sociais (edificio do antigo Ambulatorio, s/n) para formalizar a solicitude. Tamén é posible obter máis informacion no teléfono 981 700 688. Hai que lembrar que o programa Concilia desenvólvese durante o período escolar, e consiste en recoller ás nenas e nenos, á primeira hora da mañá no seu centro escolar a partir das 7.30 horas. Comprende un servizo de gardaría, no que as monitoras atenden ao alumnado, garantindo hábitos de hixiene, e ademais realizando actividades de lecer e tempo libre; e un servizo de almorzo opcional para aqueles nenos/as que o soliciten. Os interesados e interesadas poden descargar máis abaixo nesta mesma nova o cadro de prezos e condicións, así como o folleto informativo do Concilia en pdf.

MÁIS INFO NO 981 702 109 E NAS OFICINAS CARBALLO DEPORTE

Aberto até o martes 22 de setembro o período de inscrición para participar no Programa de Exercicio Físico para Maiores durante o curso 2015/2016

Maiores
O Concello de Carballo informa de que está aberto do 1 ao 22 de setembro o prazo para participar no Programa de Exercicio Físico para Maiores durante o curso 2015/2016. Este prazo diríxese aos usuarios e usuarias que non teñan participado no programa no curso 2014/15. De non haber prazas suficientes, quedarán rexistrados nunha listaxe de agarda. Os interesados e interesadas poden obter máis información no teléfono 981 702 109. As solicitudes poden presentarse nas oficinas Carballo Deporte situadas na rúa Vila de Corcubión s/n. O Programa de Exercicio Físico para Maiores pretende influír nos maiores para conseguir estilos de vida activos e saudables, mellorar a súa calidade de vida e facilitar a súa inserción social actuando sobre o proceso natural de envellecemento. De maneira máis específica, este tipo de actividades permítenlles manter un nivel suficiente de capacidade funcional xeral, mellorar a saúde reducindo o risco de desenvolver doenzas cardiovasculares e osteoarticulares e mellorar a súa seguridade ao facer exercicio.

MÁIS INFORMACIÓN EN HORARIO DE OFICINA NO 981 701 172

A Escola Oficial de Idiomas (EOI) de Carballo abre o prazo de preinscrición e matrícula para o Curso 2015-2016 e oferta as materias de alemán, francés e inglés

A Escola Oficial de Idiomas (EOI) en Carballo oferta cursos de alemán, francés e ingles para o ano académico 2015-2016. O periodo de preinscrición (solicitude da praza) estará aberto ata o día 14 de setembro para aquelas persoas que non estiveron matrículadas na Escola de Idiomas no curso 2014-2015. O alumnado matriculado no 2014-2015 e Apto en xuño poderá facer electiva a matrícula do 1 ao 7 setembro; o alumnado Non Apto ou Non Presentado en xuño deberá matricularse do 9 ao 14 de setembro. Para calquera dúbida, os interesados e interesadas poden poñerse en contacto coa EOI en Carballo na Xefatura de Estudos da Escola de Idiomas situada no 1º andar do Pazo da Cultura de Carballo, no telefono 981 701 172 ou tamén consultar a páxina web <www.eoicoruna.org>.

A ACTIVIDADE TERÁ LUGAR ENTRE OUTUBRO E DECEMBRO DE 2015

Aberto até o 8 de setembro o prazo para anotarse nun novo curso preparatorio para as probas de obtención do certificado de lingua galega Celga 4

A Xunta de Galicia vén de anunciar do Diario Oficial de Galicia a convocatoria en Carballo dun curso de galego preparatorio para as probas de obtención do Certificado de Lingua Galega Celga 4. Ese único curso convocado pola Xunta para Carballo terá lugar no seguinte lugar, días e horas:
  • Lugar: IES Isidro Parga Pondal. Rúa do Muíño da Pintura, s/n. Carballo
  • Datas: do 19/10/2015 ao 9/12/2015
  • Horario: de 20.00 a 22.00 horas
  • Días: de luns a venres
  • Nivel: Celga 4
A solicitude para participar debe facerse a través do rexistro da Xunta utilizando o anexo publicado na propia convocatoria, e debe xuntarse con ela unha copia cotexada do DNI. O prazo para facelo é de tan só 15 días hábiles a partir do día seguinte ao da publicación do anuncio no DOG, polo que o prazo remata o 8 de setembro.

A resolución completa da convocatoria no DOG pode consultarse en internet clicando aquí. A pesar desta convocatoria de curso, a Xunta de Galicia non anunciou aínda as datas das probas para obter o título. Cando o faga, darase cumprida información. Para consultas ou obter máis información sobre os cursos e as probas, os interesados e interesadas poden dirixirse á Secretaría Xeral de Política Lingüística da Xunta, nos seguintes teléfonos:
  • Delegación da Coruña: 981 184 898 ou 981 184 720
  • Sede de Santiago de Compostela: 981 545 436 ou 981 544 435
  • Na rede: <www.lingua.gal>

CITA PREVIA NO 902 30 90 00

A Unidade Móbil da ITV para turismos visita o Parque Empresarial de Bértoa do 10 ao 14 de setembro de 2015

ITV
O Concello de Carballo, a través da Concellaría de Planificación e Mobilidade Urbana que dirixe Milagros Lantes informa de que os días 10, 11, 12 e 14 de setembro de 2015 a Unidade Móbil da Inspección Técnica de Vehículos (ITV) para Turismos estará situada no polígono de Bértoa, a carón do campo de fútbol de As Eiroas. O horario de atención ao público para realizar a inspeccións é de 9.00 a 13.30 e de 15.15 a 18.00 horas, agás o luns 14 de setembro, en que será só de mañá, de 9.00 a 13.30 horas. Asignarase día e hora de atención directamente na Unidade Móbil desde o primeiro día de chegada á vila, ou tamén chamando previamente ao teléfono 902 30 90 00 ou na páxina web <www.sycitv.com> no apartado de "Cita previa".

HORARIO DE ATENCIÓN: DE 10.00 A 13.30 HORAS

A oficina de información da Unión de Consumidores de Galicia (UCGAL) no segundo andar da Casa do Concello reabre as súas portas o xoves 3 de setembro

O Concello informa de que a oficina de información que mantén aberta a Unión de Consumidores de Galicia (UCGAL), que estivo pechada durante o verán, retomará a súa actividade habitual o xoves 3 de setembro. Hai que lembrar que a UCGAL, en colaboración co Concello de Carballo, ten en marcha un proxecto dirixido a coñecer a demanda real de servizos de información e asesoramento en materia de consumo dos veciños e veciñas do municipio para averiguar se é necesaria a apertura dunha oficina na vila no futuro. Por iso, cunha finalidade eninentemente estatística, a Unión de Consumidores de Galicia atende as demandas das persoas interesadas os luns e os xoves en horario de 10.00 a 13.30 horas no segundo andar da Casa do Concello. Está previsto que o proxecto se desenvolva até finais do mes de outubro.

O CORTE CHEGA ATA A CONEXIÓN COA AC-552

Corte de tráfico no núcleo de A Cepeira a partir do luns 31 de agosto con motivo dos traballos de construción da Autovía da Costa da Morte

Cartel
O Concello de Carballo informa que dende o luns 31 de agosto e mentres duren os traballos de execución das obras de construción da Autovía da Costa da Morte, procederase ao corte de tráfico da estrada municipal que une o núcleo de A Cepeira coa estrada autonómica AC-552 que une A Coruña e Cee. Así vén de notificalo a sociedade concesionaria dos traballos da autovía, Aucom. Os interesados e interesadas poden consultar nun pdf neste mesmo aviso un plano onde está sinalado o treito obxecto das obras, así como o itinerario alternativo. Pedimos desculpas polas posibles molestias ocasionadas aos usuarios e usuarias.

O IMPORTE DAS AXUDAS É DE 100.000 EUROS

Resolución coa listaxe de entidades beneficiarias das subvencións para o financiamento de proxectos de actividade deportiva durante o ano 2015

O Concello de Carballo fai pública a resolución da Convocatoria de subvencións dirixidas a entidades deportivas para o financiamento de proxectos de actividade deportiva durante o ano 2015, que ascenden a un total de 100.000 euros repartidos entre trece asociacións solicitantes. Os interesados e interesadas poden consultar a listaxe nun documento en pdf máis abaixo neste mesmo aviso.

TRÁMITES: NO PAZO DA CULTURA DE 10.30 A 13.30 HORAS

Prazos de matrícula e datas dos exames do Conservatorio Profesional de Música de Carballo para a convocatoria de setembro

O Concello de Carballo a través da Concellaría de Educación que dirixe Mar Eirís informa de que o alumnado interesado en facer unha proba de acceso para calquera dos cursos de Grao elemental ou Profesional do Conservatorio Profesional de Música, agás para o 1º curso de Elemental e Profesional, deberá formalizar a súa matrícula entre o 1 e o 4 de setembro. A data para estas probas é do día 10 de setembro. O alumnado que non superou o curso 2014/2015 en xuño, examinarase das materias pendentes o día 9 de setembro. Posteriormente, estes alumnos e alumnas e todos os que por algunha razón non formalizaron a matrícula no mes de xullo, poden facelo entre o 14 e o 18 de setembro. Para a realización destes trámites deberán dirixirse ao 1º andar do Pazo da Cultura en horario de 10.30 a 13.30 horas (Oficinas de Cultura-Conservatorio).

O PXOM ESTÁ PENDENTE DA APROBACIÓN DEFINITIVA DA XUNTA

O Concello pon a disposición da veciñanza o documento para a aprobación provisional do Plan Xeral de Ordenación Municipal (PXOM) no web municipal

Os veciños e veciñas e todos os interesados e interesadas xa poden consultar no web municipal a documentación do Plan Xeral de Ordenación Municipal (PXOM). O pleno da corporación apoiou por unanimidade a aprobación provisional do PXOM do Concello de Carballo nunha sesión extraordinaria celebrada o luns 2 de febreiro de 2015. Porén, este plan non será executivo ata a aprobación definitiva por parte da Xunta de Galicia. En todo caso, o Concello pon a disposición dos interesados e interesadas o documento para a aprobación provisional, que pode consultarse nunha ligazón dispoñible máis abaixo neste mesmo aviso.

*Para poder acceder aos arquivos, recoméndase que se descarguen os documentos en pdf antes de abrilos, debido a seu elevado peso.

Buscador:



© Concello de Carballo, 2009